აუტიზმის მქონე ბავშვის დედა, მარი კორკოტაძე ლევან ვასაძეს ბოდიშის მოხდას სთხოვს. საქმე ეხება ბიზნესმენის მიერ გასულ კვირას, ნარკოპოლიტიკის ლიბერალიზაციასთან დაკავშირებით გაკეთებულ განცხადბას, რომელშიც ვასაძე აღნიშნავდა, რომ ბოლო წლებში „მამიკოების ნარკომანობის გამო აუტიზმით, დაუნის სინდრომითა და სხვა დაავადებებით ათიათასობით ბავშვი იბადება“.
მარი კორკოტაძე ლევან ვასაძეს მიმართავს, თუნდაც ერთი სარწმუნო კვლევა გამოაქვეყნოს, რომლითაც დაამტკიცებს, რომ აუტიზმი ბავშვებს ნარკომანი მშობლების გამო ემართებათ.
„როდესაც ჩემს შვილს აუტიზმის დიაგნოზი დაუსვეს, დავიწყე ფიქრი და ძიება, თუ რა ან ვინ იყო ამის მიზეზი. ერთადერთი რაზეც მაშინ ვფიქრობდი, ჩემი მძიმე ორსულობა იყო (ანტისხეულების აწეული დონე), რის გამოც 3 თვე წოლითი რეჟიმი მქონდა და საწოლიდან ჩემი ადგომა არ შეიძლებოდა. ვერანაირად ვერ ვიფიქრებდი, რომ ჩემი ქმრის „ნარკომანობის“ გამო აქვს ჩემს შვილს აუტიზმი, რადგანაც ჩემი ქმარი „ნარკომანი“ არ არის. ლევან ვასაძის ლოგიკით მეც ისეთივე ნარკომანი გამოვდივარ, როგორც ჩემი ქმარი. ძალიან ბევრს ვკითხოლობდი, რომ ჩემს კითხვებზე პასუხი მიმეღო, მაგრამ ვერ მივიღე, რადგანაც დღემდე იკვლევენ მსოფლიოს წამყვანი მეცნიერები აუტიზმს და ჯერ კიდევ ვერ დაადგინეს მისი გამომწვევი მიზეზი.
იყო დრო, როდესაც საზოგადოების ნაწილი მიიჩნევდა, რომ ჩემი ცოდვების გამო ჰქონდა ჩემს შვილს აუტიზმი, მისი ქცევებიდან გამომდინარე, ზოგი თვლიდა, რომ ეშმაკი ებრძოდა ბავშვს. ალბათ ვთანხმდებით იმაზე, რომ ყველა ადამიანი ერთმანეთისგან განსხვავებულია-ზოგი უფრო ძლიერი, ზოგიც სუსტი; ზოგი უფრო ლამაზი, ზოგიც ნაკლებად. გამოდის, რომ რაც უფრო ნაკლები ცოდვები ჰქონდათ ჩვენს წინაპრებს მით უფრო ლამაზები და ძლიერები არიან მათი შთამომავლები. ლოგიკას მოკლებულია, ხომ?
წლებია, ვიბრძვი საზოგადოებაში სწორედ ამ სტიგმებისა და სტერეოტიპების დასამსხვრევად. ძალიან ბევრი ტკივილი და გულისტკენა მქონია საზოგადოების სწორედ ამ ნაწილის მხრიდან და ყოველ ასეთ ნათქვამზე ეს ტკივილი უფრო ძლიერი და უფრო გულსატკენი ხდება. ამ დროს უბრალოდ ხვდები, რომ ყველაფერი წყალში ჩაიყარა და უკვე მერამდენედ თავიდან უნდა დაიწყო ათასჯერ დაწყებული ბრძოლა.
მოვითხოვ, ლევან ვასაძემ გამოაქვეყნოს თუნდაც ერთი სარწმუნო კვლევა (ჩემი რჩევაა, ვიკიპედიით ნუ იხელმძვანელებთ ბატონო ლევან, რადგანაც ნებისმიერს შეუძლია ვიკიპედიაში თავისი დილეტანტური აზრების დაწერა), სადაც წერია, რომ აუტიზმი, „ნარკომანი“ მშობლების გამო ემართებათ ბავშვებს. მერე კი, მიმართეთ შინაგან საქმეთა სამინისტროს, რომ ყველა აუტიზმის მქონე ბავშის მშობელი დაგვიჭროს და პასუხი გვაგებინოს იმისათვის, რომ აუტიზმი ჩვენ დავმართეთ ჩვენს შვილებს! წინააღმდეგ შემთხვევაში საჯაროდ მოგვიხადეთ ბოდიში აუტიზმის მქონე ბავშვების მშობლებს, რომ იმ 256 ათასმა ადმიანმა მოისმინოს ეს ყველაფერი, რომ მერე შემთხვევით ისევ არ გადავაწყდე ისეთ კომენტარებს, რომელზეც ზემოთ დავწერე.
ჩემი რჩევაა, მეტი ინფორმაცია წაიკითხოთ აუტიზმის შესახებ, რომ ილიას ხერხივით თქვენც გქონდეს და სხვასაც მიაწოდოთ სწორი ინფორმაცია, ცოდნა და განათლება. თქვენივე სიტყვებს მოვიშველიებ და გეტყვით, რომ შეწყვიტოთ „ფლიდი აპელირება“ და ჩვენით და ჩვენი შვილებით სპეკულირება. თქვენი მე-9 ტელემიმართვა სწორედ, რომ “სიბინძურის, მორალური და ფიზიკური დეგრადაციის სამარცხვინო და დასაცინი მაგალითია”. დიახ! თქვენ ჩვენ დაგვცინით!
ჩუმად ჯდომის დრო, მართლაც დამთავრდა“, - აცხადებს მარი კორკოტაძე.
