თბილისის საკრებულოს გლდანის რაიონის მაჟორიტარი დეპუტატი შალვა ოგბაიძე, რაიონის გამგებელთან, ბექა მიქაუტაძესთან ერთად, მოსახლეობას შეხვდა და მათ 2018 წლის დედაქალაქის ბიუჯეტით გათვალისწინებული პროგრამები გააცნო.
როგორც შალვა ოგბაიძემ განაცხადა, თბილისის მთავარი საფინანსო დოკუმენტი გლდანის რაიონში სხვადასხვა ინფრასტრუქტურული და სოციალური პროექტების განხორციელებას ითვალისწინებს. კერძოდ, მომავალ წელს გლდანში როგორც ცენტრალური, ასევე შიდა კვარტალური გზების კეთილმოწყობა და მათი რეაბილიტაცია იგეგმება.
დეპუტატის თქმით, რაიონში მომავალ წელს ავარიული კორპუსების გამაგრებაც მოხდება. გარდა ამისა, განხორციელდება წყალარინების ქსელის მოწყობა. შალვა ოგბაიძის განმარტებით, 26 მაისისა და დოდო აბაშიძის ქუჩებზე წყალარინების ქსელის მოწყობის შემდეგ, კანალიზაციის პრობლემა ავაჭლა 2-სა და სოფელ გლდანში სრულად მოგვარდება.
რაც შეეხება ტრანსპორტის მიმართულებით განსახორციელებელ პროექტებს, შალვა ოგბაიძის თქმით, 2018 წელს ავტობუსების მოსაცდელების მოწყობა ავჭალის ტერიტორიიდან დაიწყება. მისივე განცხადებით, რაიონში ზებრა გადასასვლელებიც დაიხაზება. დეპუტატის თქმით, გზებზე შუქნიშნების მონტაჟიც განხორციელდება.
გარდა ამისა, ოგბაიძის თქმით, რაიონში გამწვანების ღონისძიებები ჩატარდება. ასევე სკვერებისა და სპორტული მოედნების მოწყობა იგეგმება.
