პოეტი ზვიად რატიანი ე.წ. ძველი რკინიგზის საავადმყოფოში გადაიყვანეს. ამის შესახებ მისმა ადვოკატმა, ანი ნასრაშვილმა "ჯი-ეიჩ-ენს" განუცხადა.
ადვოკატის განცხადებით, რატიანს სხეულის დაზიანებები, ასევე ტვინის შერყევა აქვს, ასევე უჭირს გადაადგილებაც, რის გამოც, ის დღევანდელ სასამართლო პროცესზე ვერ გამოცხადდა. ადვოკატის ინფორმაციით, რატიანმა სასწრაფო-სამედიცინო დახმარების ბრიგადა სახლში გამოიძახა, სწორედ ამის შემდეგ გადაიყვანეს ის საავადმყოფოში.
შეგახსენებთ, რატიანი სამართალდამცავებმა თამარ მეფის გამზირზე დააკავეს. მას ადმინისტრაციულ სამართალდარღვევათა კოდექსის 116-ე და 173-ე მუხლების დარღვევაში ედება ბრალი. როგორც რატიანი აცხადებს, პოლიციის თანამშრომლები დაკავების შემდეგ, რამდენიმე საათის განმავლობაში, სცემდნენ, აყენებდნენ ფიზიკურ და სიტყვიერ შეურაცხყოფას.
ადვოკატის თქმით, რატიანი ვერ ასახელებს კონკრეტულ მიზეზს, თუ რის გამო გახდა ფიზიკური შეურაცხყოფის მსხვერპლი"
