პოეტ ზვიად რატიანის დაკავების ფაქტზე მისმა კოლეგებმა ბრიფინგი გამართეს.
როგორც მწერალი ლაშა ბუღაძე აცხადებს, შსს-ს განცხადება არის უტიფრული, იმის ფონზე, თუ როგორ აწამეს პოეტი ზვიად რატიანი.
"მოხდა სრულიად გაუგონარი ფაქტი, ის არის ძალიან მძიმე მდგომარეობაში. ის საზოგადოებისთვის ცნობილი ფიგურაა და რას უზამდნენ უცნობ ადმიანს, ვინ იცის სად იქნებოდა ჩაგდებული და რა საქმეებს შეუკერავდა პროკურატურა, როგორ დაჩაგრავდნენ. რასაკვირველია, ეს არ იქნებოდა პირველი შემთხვევა. ისინი, ვინც ზვიად რატიანს გაუსწორდნენ, ამგვარივე ფორმებით იძალადებდნენ სხვებზეც. გამოჩნდეს ეს 7-8 კაცი, გვაჩვენონ ვინ არიან, ძალადობა არ არის აბსტრაქტული ცნება, მოძალადე არის კონკრეტული და როცა ამას პოლიციელი აკეთებს ეს დანაშაულია სახელმწიფოსა და მოქალაქეების წინაშე. ჩვენ მათი სახეები უდნა ვიცოდეთ, თორემ ისინი გააგრძელებენ კვლავ იგივეს. ნუ გვაშანტაჟებთ და ნუ აშანტაჟებთ ზვიად რატიანს, ის ჩანაწერები გვაჩვენეთ, რომელშიც მას სცემენ და აწამებენ.ფაქტობრივად, სიკვდილს არის გადარჩენილი. ეს არის დანაშაული და ჩვენ ვითხოვთ ძალიან მკაფიო და არა ფარისევლურ-თვალთმაქცურ რეაქციას სახელმწიფოსა და შსს-სგან", - განაცხადა ბუღაძემ.
პოეტ რატი ამაღლობელის თქმით კი, ზვიად რატიანის საქმე უნდა იქცეს ყველა აქამდე დაჩაგრული ხალხისთვის გამამხნევებელ მაგალითად.
"ამ ამბავს ჩვენ ბოლომდე ჩავყვებით, იმიტომ, რომ ეს არ არის ერთი ადამიანის დაცვა. ეს არის ადამიანის ფუნდამენტური უფლებების დაცვა, როცა დაკავების შემდგომ მოქალაქე 4 საათის განმავლობაში არის მორალური ზეწოლის წნეხისა და ფიზიკური ძალადობის ქვეშ... დროა დაივიწყოთ სტალინური მეთოდები, გარეთ 21 საუკუნეა და სხვანაირად უნდა ებრძოლოთ კრიმინალს, რაშიც მთელი საზოგადოება დაგიდგებათ გვერდით. ეს ხალხი კი დარწმუნებული ვარ, წლების განმავლობაში ადამიანებს ხან იარაღს უდებდა და ხან ნარკოტიკს.
ზვიადის მდგომარეობა არის ძალიან მძიმე და ჩვენ ადვოკატებთან კონსულტაციით, ამ საქმეს მთელი ქართული საზოგადოება მივყვებით ბოლომდე, რათა დავიცვათ მოქალაქეები ქუჩაში გამოსული მოძალადეებისგან, რომლებსაც სამწუხაროდ ზურგს სახელმწიფო უმაგრებს.
შეგახსენებთ, დღეს 24 დეკემბერს პოეტი ზვიად რატიანი დააკავეს.
