რუსეთისა და ბრიტანეთის პირველი დიპლომატები მოსკოვში შეხვედრის შემდეგ გამართულ პრესკონფერენციაზე წაკამართდნენ. ეს მას შემდეგ მოხდა, რაც სერგეი ლავროვმა ბრიტანეთის არჩევნებში რუსეთის ჩარევის შესახებ ჟურნალისტის კითხვას უპასუხა.
„ამის დამადასტურებელი მტკიცებულებები ჯერ არავის წარმოუდგენია. ჩემმა ბრიტანელმა კოლეგამაც კი აღიარა, რომ არ აქვს მტკიცებულებები ბრექსიტში რუსეთის ჩარევის,“-აღნიშნა რუსეთის საგარეო საქმეთა მინისტრმა, რასაც ბორის ჯონსონის რეპლიკა მოჰყვა: „წარმატებული ჩარევის. ეს უფრო სწორი ფორმულირება იქნებოდა.“
ლავროვი ჯონსონის რეპლიკამ გააღიზიანა და განაცხადა, რომ ჯონსონს ეშინია მისი რეპუტაცია ბრიტანულ მედიასაშუალებებში არ შეილახოს, რაზეც ჯონსონმა უპასუხა, რომ კოლეგის რეპუტაცია მასაც აღელვებს.
„ვფიქრობ, ძალიან მნიშვნელოვანია, აღიაროთ რუსეთის მცდელობა ჩვენს რეფერენდუმსა და არჩევნებში ჩარევის. როგორიც უნდა ყოფილიყო ეს მცდელობები, მან წარუმატებლობა განიცადა,“-განაცხადა ჯონსონმა.
ამის შემდეგ ლავროვმა ტონი კიდევ უფრო გაამკაცრა. „ფაქტების გარეშე საუბარი ძნელია. ვფიქრობ, ეს ყველაფერი თქვენი დასავლური კამპანიის ფარგლებში თქვენ თვითონ მოიგონეთ და სამწუხაროდ ამ თეორემის ტყვეობაში რჩებით. ძალიან მძიმეა იმ მესერიდან ჩამოძრომა, რომელზეც თქვენ აძვერით,“-აღნიშნა ლავროვმა.
