გორის ადმინისტრაციულ შენობაში ერთ-ერთმა დევნილმა, პროტესტის ნიშნად, ვენები გადაიჭრა. მამაკაცი უკვე სტაციონარშია გადაყვანილი მანამდე კი მას პირველადი დახმარება დაცვის პოლიციის თანამშრომლებმა აღმოუჩინეს.
აფხაზეთიდან დევნილი მამაკაცი სხვა შეკრებილებთან ერთად დევნილთა და განსახლების მინისტრის, სოზარ სუბარის გორში ჩასვლას ითხოვს და აპროტესტებს სამინისტროს მიერ გუშინ გამოქვეყნებული სიის შედგენის პრინციპს.
ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო გუშინ გამოაქვეყნა იმ დევნილების სია, რომლებიც გორში აშენებული მრავალსართულიან კორპუსებში 1, 2 და 3 ოთახიან ბინებს მიიღებენ.
ადმინისტრაციულ შენობაში შეკრებილების მტკიცებით კი ათობით ისეთი ადამიანი დარჩა უბინაოდ, ვისაც იმედი ჰქონდა, რომ წელს საცხოვრებელი ფართით დაკმაყოფილდებოდა.
მათივე თქმით, მანამ არ დაიშლებიან, სანამ სამინისტროს წარმომადგენლები არ შეხვდებიან და კონკრეტულ პასუხს არ გასცემენ.
