საქართველოს სოციალურ მუშაკთა ასოციაცია, დღეს, 21 დეკემბერს, მთავრობის ადმინისტრაციასთან საპროტესტო აქციას გამართავს.
ასოციაცია აპროტესტებს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის მიერ "სოციალური მუშაობის შესახებ“ კანონის პროექტის სამუშაო ვერსია წარადგენას, რადგან მათი განცხადებით, კანონპროექტზე მუშაობაში ჩართულნი არ ყოფილან სფეროს სპეციალისტები და პრაქტიკოსები.
აქციის ორგანიზატორები მოითხოვენ:
1. ჩამოყალიბდეს მოქმედი სამუშაო ჯგუფი კანონპროექტზე მუშაობისათვის პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის ბაზაზე
2. შესრულდეს პეტიციის მოთხოვნები და დაინიშნოს შეხვედრა ჯანდაცვის მინისტრთან სოციალური მუშაკების პრობლემებზე სასაუბროდ.
„კომიტეტის თავჯდომარის, ქ-ნ სოფო კილაძის და ზოგადად კომიტეტის დამოკიდებულება სოციალური მუშაობის პროფესიის, კანონპროექტის შექმნის პროცესებისა და სოციალური კეთილდღეობის ექსპერტებისა თუ ამ სფეროში მომუშავე პირების მიმართ, შემაშფოთებელია.
კანონპროექტი, რომელიც უნდა იყოს სოციალური მუშაობის განვითარებაზე მიმართული, ვერ უძლებს კრიტიკას, რადგან მისი შემუშავების პროცესში არ ყოფილან ჩართულნი სპეციალისტები და პრაქტიკოსები.
პროფესიაზე კანონპროექტი დაიწერა მხოლოდ იურისტების მიერ, რომლებსაც არ აქვთ ცოდნა და განათლება სოციალურ მუშაობაში. ფაქტობრივად, ამ პროცესში საწყის ეტაპზე მოხდა ექსპერტებისა და პრაქტიკოსების დისკრედიტაცია, ხოლო საკომიტეტო შეხვედრაზე მათი მოწვევა კი მათ მიმართ დისკრიმინაციული მიდგომებით და შეურაცხმყოფელი დამოკიდებულებით დამთავრდა.
სოციალურ მუშაკთა ასოციაცია მოგიწოდებთ, დავდგეთ ერთად და ერთად დავიცვათ ჩვენი, ჩვენი პროფესიისა და ამ პროფესიის მოსარგებლე ბენეფიციარების უფლებები. შეუძლებელია ქვეყანაში პროფესიული კანონპროექტები იწერებოდეს სფეროს სპეციალისტებისა და პრაქტიკოსების ჩართულობის გარეშე.
„ჩვენ შესახებ ჩვენთან ერთად“
ჩვენს აღშფოთებას აორმაგებს ის ფაქტიც, რომ 28 სექტემბერს გამოქვეყნებულ პეტიციას რომელსაც 600 მდე სოციალური მუშაკი/სფეროს მხარდამჭერი პირი და 42 ადგილობრივი და საერთაშორისო ორგანიზაცია აწერს ხელს, არ მოჰყოლია ქმედითი რეაგირება არც ერთი უწყების მხრიდან. მიუხედავად იმისა, რომ ასოციაციამ არაერთ უწყებას მიმართა წერილობით, ასევე პირადი საუბრებით მოითხოვა შეხვედრა და პეტიციის პირობების გათვალისწინება, მოხდა მხოლოდ ფორმალური პასუხების მიღება და უწყებებს შორის საკითხების გადამისამართება. მივმართეთ: ჯანდაცვის სამინისტროს, პარლამენტის ადამიანის უფლებათა დაცვისა და სამოქალაქო ინტეგრაციის კომიტეტსა და ჯანდაცვის კომიტეტს და საქართველოს მთავრობის ადმინისტრაციის ადამიანის უფლებათა დაცვის სამდივნოს. დღემდე ველოდებოდით მათგან შეხვედრის ჩანიშვნას, თუმცა ამაოდ“, - აცხადებენ აქციის ორგანიზატორები.
