საქართველოს პარლამენტში საპარლამენტო უმცირესობასთან პრემიერ-მინისტრობისა და მთავრობის წევრობის კანდიდატების შეხვედრა მწვავე კამათით დასრულდა.
პარლამენტში დაპირისპირება "ევროპული საქართველოს" ერთ-ერთი ლიდერის, გიგა ბოკერიას კომენტარმა გამოიწვია, რომელმაც მმართველი გუნდი ევროსაბჭოში რუსეთისთვის ხმის მიცემის უფლების აღდგენის საკითხზე, საქართველოს მკაფიო პოზიციის არდაფიქსირებისთვის გააკრიტიკა.
ბოკერიას თქმით, "ქართული ოცნების" სლოგანია "სანამ გაგვდის, ასე გავაგრძელებთ". მან მმართველი გუნდის საქმიანობას დანაშაულებრივი უწოდა.
”უკრაინაში აგრესიის შემდეგ, ევროსაბჭოს საპარლამენტო ასამბლეამ რუსეთს შეუჩერა ხმის უფლება. ამ რეზოლუციაში საქართველოს პრობლემაც ნახსენებია. ეს კარგია ჩვენთვის. სამწუხაროდ, არიან ძალები, რომლებიც ცდილობენ ხმა დაუბრუნონ რუსეთს ისე, რომ მას არ შეუსრულებია რეზოლუციის პირობა. ბუნებრივია საქართველოს მიზანია, რომ თუ ვინმე ცდილობს რუსეთს ეს სანქციები მოუხსნას, ჩვენ ამის წინააღმდეგ ხმა ავიმაღლოთ. როგორც გაირკვა, ბოლო განხილვისას კომიტეტზე, საქართველოს პოზიცია საერთოდ არ დაუფიქსირებია. დღეს ვკითხეთ ბატონ ჯანელიძეს, ინსტრუქცია გაქვთ თუ არა მიცემული ელჩისთვის, რომ ყველა დოზით დაუპირისპირდეთ რუსეთისთვის ამ სანქციის მოხსნას, პასუხი მივიღეთ ზოგადი, რომ გაცემულია ინსტრუქცია იმოქმედოს ქვეყნის ინტერესებიდან გამომდინარე. არ გაქვთ ინსტრუქცია და ეს არის დანაშაულებრივი საქმიანობა. სანამ გაგვდის, ასე გავაგრძელებთ, ეს არის თქვენი სლოგანი”, - მიმართა ბოკერიამ მმართველ გუნდს, რაზეც პრემიერმა უპასუხა, რომ არც ერთი საერთაშორისო ფორმატი არ ყოფილა, სადაც საქართველო არ იყო სოლიდარული უკრაინისადმი.
მისივე თქმით, კონკრეტულ შემთხვევაში საქართველო მოქმედებს ევროსაბჭოს პრინციპების და სახელმწიფო ინტერესების გათვალისწინებით. როგორც პრემიერმა აღნიშნა, მათ არასდროს ჰქონიათ კაპიტულანტური პოზიცია ოკუპანტის მიმართ.
ბოკერიას კითხვას, გაბრაზდა თუ არა პრემიერმ მის განცხადებაზე, კვირიკაშვილმა უპასუხა, რომ მთელი საქართველოა მათზე გაბრაზებული. მისივე თქმით, ვის აქვს დანაშაული ჩადენილი, ეს 7%-შია ასახული, რომელიც მოსახლეობამ მათ მისცა.
”მე კი არა მთელი საქართველოა თქვენზე გაბრაზებული. ის, რაც თქვენ საქართველოს წინაშე გაქვთ გაკეთებული, ღმერთმა დაიფაროს ყველა პოლიტიკური ძალა. დანაშაული ვის აქვს ჩადენილი, ასახულია 7%-ში, რომელიც ჩვენმა მოსახლეობამ მოგცათ თქვენ”, - დასძინა კვირიკაშვილმა.
