რელიგიას, რომლის ორი ამოსავალი ძირითადი ფუნდამენტური ღირებულება არის ის, რომ გიყვარდეს მტერი შენი და ნუ განიკითხავ სხვა ადამიანს, ჩვენ ვაქცევთ ერთმანეთისთვის თავში ტაბურეტის ჩარტყმის საშუალებად, - ამის შესახებ საქართველოს პრეზიდენტმა გიორგი მარგველაშვილმა ქალთა მიმართ ძალადობის წინააღმდეგ გამართულ ღონისძიებაზე განაცხადა.
მისი თქმით, სივრცე, რომელშიც ჩვენ ვტრიალებთ, აგრესიითაა სავსე და არ არის გასაკვირი რომ ამ სივრცეში ჩვენი შვილები ხდებიან მსხვერპლები.
"თუ მკითხავთ პოლიტიკაზე, მე გეტყვით, რომ ყველაზე მეტად დაფასებული არის პოლიტიკოსი, რომელიც თავის პოზიციას აგრესიულად გამოხატავს. როგორც პოლიტიკოსი, გეტყვით სამწუხარო რეალობას, რაც უფრო აგრესიულად გამოვდიოდი ან გამოვდივარ, მით უფრო მოსაწონი ვარ ხოლმე საზოგადოებისთვის. მით უფრო მეტად მოსწონთ - მიდი უფრო აგრესიული და შემტევი იყავი. ეს არის ის სივრცე, რომელშიც ჩვენ ვტრიალებთ. ამ სივრცეში მერე არ უნდა გაგვიკვირდეს ალბათ, რომ ჩვენი შვილი იქნება აგრესიის მსხვერპლი. აგრესიის მსხვერპლია ნებისმიერი ბავშვი, იქნება ის დაჭრილი თუ ის, ვინც დაჭრის", - განაცხადა გიორგი მარგველაშვილმა.
პრეზიდენტმა ადამიანებს, რომლებსაც თავი ძლიერად მიაჩნიათ, მოუწოდა რომ, თუ მათი ყოველდღიურობა ჩაგვრის ნაცვლად იმით იქნება სავსე, როგორ შეუმსუბუქა სხვა ადამიანს ცხოვრება, ამ მომენტიდან შეიცვლება მეზობელი ქალების და მეგობარი შვილების ცხოვრება.
"თუ თქვენი ყოველდღიური ყოფა სავსე იქნება არა იმით, თუ როგორ დაჩაგრეთ ადამიანი, არამედ იმით, როგორ შეუმსუბუქეთ სხვა ადამიანს ცხოვრება, მხოლოდ ამ მომენტიდან შეიცვლება თქვენი მეზობელი ქალბატონის ან თქვენი მეგობრის შვილის ცხოვრება", - დასძინა საქართველოს პრეზიდენტმა.
