„ილია ტუღუში არ ყოფილა არანაირად დაკავშირებული იმ მატჩთან. მეტიც, მას არ უმსაჯია ეროვნული ლიგის არცერთი მატჩი, ასევე არც ეროვნული ლიგა 2-ისა და ლიგა 3-ის მატჩები, ის მსაჯობდა ახალგაზრდულ პირველობებსა და რეგიონულ გათამაშებას“, - ასე ეხმაურება ქართველი მსაჯის, ილია ტუღუშის გარდაცვალებას ფეხბურთის ფედერაციის პრეზიდენტი, ლევან კობიაშვილი.
როგორც კობიაშვილი განმარტავს, გავრცელებული ინფორმაცია იმის შესახებ, რომ ტუღუში 3 დეკემბერს საპლეიოფო მატჩს მსაჯობდა "ლანჩხუთის გურიასა" და თელავს შორის, სიმართლეს არ შეესაბამება.
„მინდა გამოვეხმაურო ჩვენთვის ძალიან მძიმე შემთხვევას და კიდევ ერთხელ მივუსამძიმრო გარდაცვლილი მსაჯის – ილია ტუღუშის ოჯახის წევრებს, ახლობლებს, მეგობრებს, სრულიად საფეხბურთო სამყაროს. ამასთან, მინდა, ვთხოვო მედიის წარმომადგენლებს, რომ ინფორმაციის გავრცელებისას მეტი სიფრთხილე გამოიჩინონ და ნუ შეიყვანენ შეცდომაში საზოგადოებას. კერძოდ, ვგულისხმობ, გავრცელებულ უსაფუძვლო ინფორმაციას, თითქოს ილია ტუღუში მსაჯობდა 3 დეკემბრის საპლეიოფო მატჩს – ლანჩხუთის გურიასა და თელავს შორის. ილია ტუღუში არ ყოფილა არანაირად დაკავშირებული ამ მატჩთან. მეტიც, მას არ უმსაჯია ეროვნული ლიგის არცერთი მატჩი, ასევე არც ეროვნული ლიგა 2-ისა და ლიგა 3-ის მატჩები, ის მსაჯობდა ახალგაზრდულ პირველობებსა და რეგიონულ გათამაშებას. აქვე მინდა აღვნიშნო, რომ დასახელებული სამი პირიდან არცერთი არ არის და არც ყოფილა ფეხბურთის ფედერაციის თანამშრომელი. და ბოლოს, მინდა, მკაფიოდ დავაფიქსირო ჩვენი, ფეხბურთის ფედერაციის პოზიცია – ჩვენ მზად ვართ, საჭიროების შემთხვევაში, ვითანამშრომლოთ გამოძიებასთან და ვიმედოვნებ, რომ შესაბამისი უწყებები უმოკლეს ვადაში დაადგენენ სიმართლეს”,- აცხადებს კობიაშვილი.
იმავეს ადასტურებს „ჯი-ეიჩ-ენთან“ „ლანჩხუთის გურიას“ აღმასრულებელი დირექტორის მოადგილე, ნუგზარ ჩხაიძე. მისი განმარტებით, ტუღუშთან, როგორც არბირტთან ხშირად ჰქონდა საუბრები და კონსულტაციები, ითვალისწინებდა მის რჩევებსა და დარიგეგებს.
„ეს მსაჯი იმ კვალიფიკაციის არ იყო, რომ მესამე ლიგაზე ემსაჯა, ის იყო დაბალი კვალიფიკაციის და შესაბამისად, 3 დეკემბერს მსაჯი ვერ იქნებოდა. მე მასთან კონსულტაციები მქონდა, არ შეიძლებოდა კონსულტაციები გამევლო?“, - განაცხადა ჩხაიძემ.
შეგახსენებთ, რომ რამდენიმე დღის წინ, ფეხბურთის მსაჯი, 33 წლის ილია ტუღუში მალთაყვაში, ზღვის პირას მდებარე ნაძვნარში ხეზე ჩამომხრჩვალი იპოვეს.
საქმის ძიება სისხლის სამართლის კოდექსის 115-ე მუხლით მიმდინარეობს, რაც თვითმკვლელობამდე მიყავანას გულისხმობს.
