მოსკოვის ცენტრში, პოლიციელს მთავრობის სანომრე ნიშნებიანი ავტომობილი დაეჯახა. 32 წლის უფროსი ლეიტენანტი სერგეი გრაჩოვი ადგილზევე გარდაიცვალა.
ინტერნეტში გავრცელებულ ვიდეოზე ჩანს, როგორ მიექანება მერსედესის მარკის ავტომანქანა ,,ნოვი არბატის“ ქუჩაზე და ეჯახება პოლიციელს.
სანომრე ნიშნები (АМР) მიანიშნებს, რომ მერსედესი უშიშროების ფედერალურ სამსახურს ეკუთვნის, მაგრამ ჯერ-ჯერობით უცნობია, ვინ მართავდა მას, ან ვის სახელზეა გაფორმებული, იუწყება რუსეთის საინფორმაციო სააგენტო „ტასი“.
ცნობების თანახმად, ავარიის ადგილზე მისულმა პოლიციელებმა ავტომანქანას სანომრე ნიშნები მოხსნეს და ახლოს არ მიუშვეს ჟურნალისტები. დაწყებულია გამოძიება.
