„მოწმე შანიძეს 15 წლიანი პატიმრობა აქვს მისჯილი და სახელმწიფოს მისთვის თანამშრომლობის სანაცვლოდ, რაიმე შეღავათი, თუნდაც საპროცესო შეთანხმება არ შეუთავაზებია“, - ამის შესახებ დავით ოთხმეზურის მკვლელობის საქმის პროკურორმა ამირან გულუაშვილმა ბრალდებულ ასლან ბეჟანიძის დედის განცხადების საპასუხოდ განაცხადა.
მისივე თქმით, მოწმეთა დაცვის პროგრამა სახელმწიფო საიდუმლოება და მოწმე შანიძის ამ სიაში ყოფნისა თუ არყოფნის გაჟღერების უფლება არ აქვს.
„სამართალდამცავ ორგანოებთან შანიძის თანამშრომლობა 2015 წელს მოხდა და ეს ეხება სისხლის სამართლის 2 საქმეს. ორივე საქმეზე ის სასამართლოს წინაშე წარსდგა და ჩვენება მისცა. შანიძე ორივე მკვლელობის თვითმხილველი მოწმეა, თუმცა მის გარდა არსებობს კიდევ სხვა მტკიცებულებები, რომლითაც დასტურდება, კონკრეტულ პირთა დამნაშავეობა ორივე საქმეში“, - განმარტა პროკურორმა.
კითხვაზე, მოწმეთა ჩვენებების გარდა თუ რა მტკიცებულებები აქვს ბრალდების მხარეს აღნიშნულ საქმეში, პროკურორი პასუხობს, რომ დანაშაულის ჩადენიდან ბევრი წელია გასული, შესაბამისად დანაშაულის ჩადენის ნივთმტკიცება ამოღებული ვერ იქნება.
„ასლან ბეჟანიძე გარკვეულ პირთა ხელშეწყობით წლების განმავლობაში წარმატებით არიდებდა გამოძიებას. ბუნებრივია, მისი დაკავება, მის მიმართ და საგამოძიებო მოქმედებების ჩატარება ვერ მოხერხდა. ბეჟანიძის მიმალვის პირობებში, ფაქტობრივად, შეუძლებელი იყო ნივთიერი მტკიცებულებების მოპოვება, რაც დაკავშირებული იყო შემთხვევის ადგილთან და უშუალოდ გარდაცვლილთან.
ყველა საგამოძიებო მოქმედება ჩატარდა, სამართალდამცავებს ბეჟანიძის ოჯახის წევრებმა განუცხადეს, რომ მათთვის ბეჟანიძის ადგილსამყოფელი უცნობი იყო.
2010 წელს კი, როცა ისინი სამართალდამცავ ორგანოში ხელმეორედ დაიბარეს, მისი ოჯახის წევრების მტკიცებით, ბეჟანიძე, რომელსაც ფიზიკური ნაკლი აქვს და დამოუკიდებლად ვერ გადაადგილდება, თურმე ესპანეთში იმყოფება, ცოლ-შვილთან ერთად. როგორც შემდეგ გაირკვა, ის არც არასდროს ყოფილა ესპანეთში და არც ცოლ-შვილი ჰყოლია ოდესმე.
აქედან გამომდინარე, თქვენ გააკეთეთ დასკვნა, ვისი ხელშეწყობით ემალებოდა ის სამართალდამცავებს“, - განაცხადა პროკურორმა ამირან გულუაშვილმა.
დავით ოთხმეზურის მკვლელობის საქმის სასამართლო პროცესი 4 ოქტომბერს, მხარეთა რეპლიკებით განახლდება.
