„ჩემი შვილი შშმ პირია, პროკურატურას ხელების შეწმენდა მოუნდა იმ ადამიანზე, რომელსაც საკუთარი თავის დაცვაც არ შეუძლია“, - ამის შესახებ დავით ოთხმეზურის მკვლელობაში ბრალდებულის, ასლან ბეჟანიძის დედამ, დღევანდელი პროცესის შემდეგ "ჯი-ეიჩ-ენს" განუცხადა და დასძინა, რომ პროკურორს ორ სხვადასხვა საქმეზე ერთი მოწმე ჰყავს.
როგორც ბეჟანიძის დედა, თამარ მუქერია ამბობს, მისი შვილი ქობულეთიდანაა და თბილისში ნაცნობებიც არ ჰყავს.
„ჩემი შვილი გონებაშეზღუდულია, თანაც ქობულეთიდანაა, თბილისში არავის იცნობდა და ხელების შეწმენდა მოუნდათ იმ ადამიანზე, რომელსაც საკუთარი თავის დაცვაც არ შეუძლია.
პროკურატურამ ძალიან კარგად იცის ვინ არის მკვლელი , მეც დაახლოებით ვიცი და ეს ცოტა ხანში გაჟღერდება, ჩემი შვილი რომ უდანაშაულოა ეს ზუსტად ვიცი“, - აცხადებს მუქერია.
მისივე თქმით, საქმის მოწმეები მძიმე დანაშულებში არიან ეჭვმიტანილი.
„როგორ შეიძლება ერთი და იმავე პროკურორს ჰყავდეს ერთი და იგივე მოწმეები ჰყავდეს სხვადასხვა საქმეში? თან მოწმეები, რომლებიც ძალიან მძიმე დანაშაულში, მკვლელობაში არიან ბრალდებული.
მოწმეები, რომლებიც ერთ კამერაში ისხდნენ, ამ ჩვენებების შემდეგ პროკურორმა საპროცესოთი გამოუშვათ.
ერთ-ერთი მოწმე, ვინმე შანიძე სერიული მკვლელია. მას 33 წელი ჰქონდა მისჯილი, და ისევ მოწმეთა დაცვის პროგრამაშია.
მან ადრე ციხეში მოკლა ვინმე ფარტენაძე, ფარტენაძის ოჯახთან ერთი კვირის წინ პროკურატურა ჩავიდა და უთხრა, შანიძემ ბევრი ჩვენება მოგვცა და უნდა გავათავისუფლოთ და ხელი მოგვიწერეთო. რა თქმა უნდა, ოჯახი ამის სასტიკი წინააღმდეგი იყო, თუმცა პროკურატურას მისთვის უთქვამს, რა აზრი აქვს მოაწერთ თუ არა ხელს, მაინც გამოვუშვებთო.
ეს ხომ ერთი დანაშაულია და მეორე ის, რომ უდანაშაულო ბავშვის დაჭერა უნდათ. პროკურატურას რაიმე მტკიცებულება რომ ჰქონდეს, დღევანდელ პროცესს არ გადადებდა. სულ რაღაც 15 წუთი სჭირდებოდა მის სიტყვას და მაინც პროცესის გადადება მოითხოვა პროკურორმა“, -განაცხადა ასლან ბეჟანიძის დედამ.
დღს თბილისის სააპელაციო სასამართლოში აკადემიკოს მარიკა ლორთქიფანიძის შვილიშვილის, დავით ოთხმეზურის მკვლელობის საქმეზე, დაცვის მხარემ დასკვნითი სიტყვა წარმოთქვა.
აღნიშნულ საქმეზე შემდეგი სასამართლო სხდომა 4 ოქტომბერსაა ჩანიშნული. ამ დღეს მოსამართლე საქმეზე განაჩენს გამოიტანს.
შეგახსენებთ, რომ 2004 წლის 27 ოქტომბერს, თბილისში, აკადემიკოს მარიკა ლორთქიფანიძის 18 წლის შვილიშვილი, დავით ოთხმეზური მოკლეს. აღნიშნულ საქმეზე პროკურატურა 11 წლის განმავლობაში დუმდა. 2015 წელის მარტში კი პროკურატურამ აღნიშნულ საქმეზე გამოძიება გააქტიურა. 2016 წლის 26 მარტს, სასამართლოს განჩინების საფუძველზე ასლან ბეჟანიძე დააკავეს. პროკურატურა ირწმუნებოდა, რომ 2004 წლის მკვლელობის დღეს, დავით ოთხმეზურსა და ასლან ბეჟანიძეს შორის კონფლიქტი მობილიურ ტელეფონთან დაკავშირებით წარმოიშვა, რა დროსაც, ბეჟანიძემ ოთხმეზურს დანით რამდენიმე ჭრილობა მიაყენა და შემთხვევის ადგილიდან მიიმალა.
2016 წლის 22 დეკემბერს, თბილისის საქალაქო სასამართლომ ასლან ბეჟანიძე უდანაშაულოდ სცნო და პატიმრობიდან გაათავისუფლა.