თბილისის სააპელაციო სასამართლოში აკადემიკოს მარიკა ლორთქიფანიძის შვილიშვილის, დავით ოთხმეზურის მკვლელობის საქმეზე დაცვის მხარემ დასკვნითი სიტყვა წარმოთქვა.
როგორც ბრალდებულ ასლან ბეჟანიძის ადვოკატი, ტარიელ კაკაბაძე აცხადებს, საქმეში მხოლოდ მოწმეთა ურთიერთსაწინააღმდეგო ჩვენებები არსებობს.
„ბრალდების მხარეს სურს, ეს დანაშაული ცრუ მოწმეების ჩვენებების საფუძველზე დაამტკიცოს, თუმცა ეს ჩვენებები ვერანაირ კრიტიკას ვერ უძლებს. ისინი, აბსოლუტურად, ურთიერთსაწინააღმდეგოა.
საქმეში ყველა უტყუარი მტკიცებულება მიუთითებს ბრალდებულის უდანაშაულობაზე. ბრალდების მარე მხოლოდ მოწმეთა ჩვენებებზე აპელირებს, რომელიც არადამაჯერებელია.
ჩვენებები შეგვიძლია 2 ნაწილად დავყოთ: 2004 წელს, მკვლელობის წელსვე დაკითხული მოწმეები და 2016 წელს დაკითხულები. ბრალდების მხარის ყველა მოწმე მრავალჯერ ნასამართლევი პირია, რომელთაც საპროცესო შეთანხმება სწორედ მას შემდეგ გაუფორმდათ, რაც მათ ხელი დაადეს ჩემს უდანაშაულო დაცვის ქვეშ მყოფს.
საქმეში მთელი რიგი მტკიცებულებები მოიპოვება, რომ მათ მიმართ უამრავი გამამტყუნებელი განაჩენია დამდგარი. მოწმეებმა სასამართლოში დაადასტურეს, რომ მათ საპროცესო შეთანხმება არაერთხელ გაუფორმდათ, მიუხედავად იმისა, რომ ისინი ბრალდებული იყვნენ მძიმე კატეგორიის დანაშაულის ჩადენაში.
ერთ-ერთმა მოწმემ პირდაპირ თქვა, რომ მისი და ამ საქმის პროკურორი ერთი იგივე ადამიანია.
ერთ-ერთი დღესაც მსჯავრდებულია", - განაცხადა ბრალდებულ ასლან ბეჟანიძის ადვოკატმა, ტარიელ კაკაბაძემ.
ცნობისთვის, აღნიშნულ საქმეზე შემდეგი სასამართლო სხდომა 4 ოქტომბერსაა ჩანიშნული. ამ დღეს მოსამართლე საქმეზე განაჩენს გამოიტანს.
შეგახსენებთ, რომ 2004 წლის 27 ოქტომბერს, თბილისში, აკადემიკოს მარიკა ლორთქიფანიძის 18 წლის შვილიშვილი, დავით ოთხმეზური მოკლეს. აღნიშნულ საქმეზე პროკურატურა 11 წლის განმავლობაში დუმდა. 2015 წელის მარტში კი პროკურატურამ აღნიშნულ საქმეზე გამოძიება გააქტიურა. 2016 წლის 26 მარტს, სასამართლოს განჩინების საფუძველზე ასლან ბეჟანიძე დააკავეს. პროკურატურა ირწმუნებოდა, რომ 2004 წლის მკვლელობის დღეს, დავით ოთხმეზურსა და ასლან ბეჟანიძეს შორის კონფლიქტი მობილიურ ტელეფონთან დაკავშირებით წარმოიშვა, რა დროსაც, ბეჟანიძემ ოთხმეზურს დანით რამდენიმე ჭრილობა მიაყენა და შემთხვევის ადგილიდან მიიმალა.
2016 წლის 22 დეკემბერს, თბილისის საქალაქო სასამართლომ ასლან ბეჟანიძე უდანაშაულოდ სცნო და პატიმრობიდან გაათავისუფლა.