თბილისის ბაღების მართვის სააგენტოს ხელმძღვანელის, თემურ თორდინავას განცხადებით, ბაღების ფანჯრებზე გისოსების დამონტაჟება აკრძალულია სახანძრო უსაფრთხოებიდან გამომდინარე, საქართველოს მთავრობის №370 დადგენილებით.
მისივე თქმით, დადგენილებაში საუბარია ყრუ გისოსების გამოყენების დაუშვებლობაზე.
როგორც თორდინავამ პირველი არხს განუცხადა, „მოძრავი“ ანუ გასაღები გისოსების დამონტაჟება საკითხის განხილვა დაწყებულია, მიმდინარეობს მსჯელობა 2-3 ვარიანტზე. გადაწყვეტილების შესახებ 2-3 დღეში გახდება ცნობილი და თბილისში მოქმედი ყველა ბაღისთვის იქნება სავალდებულო.
ცნობისთვის, სოციალური ქსელით გავრცელდა პეტიცია, რომლის ავტორებიც საბავშვო ბაღების ფანჯრებსა და აივნებზე გისოსების გაკეთებას მოითხოვენ.
შეგახსენებთ, გუშინ დილით ზემო ფონიჭალაში მდებარე 206-ე ბაგა-ბაღის მეორე სართულიდან სამი წლის აღსაზრდელი გადავარდა.
პაციენტი ინგოროყვას კლინიკაში ქალა-ტვინის და გულმკერდის ტრავმით შეიყვანეს.
მომხდარზე მიმდინარეობს გამოძიება სისხლის სამართლის კოდექსის 124-ე მუხლით, რაც გაუფრთხილებლობით ჯანმრთელობის ნაკლებად მძიმე ან მძიმე დაზიანებას გულისხმობს.
