საქართველოს პარლამენტის დეპუტატებს შესაძლოა იმუნიტეტი მოეხსნათ. აღნიშნული საკითხი დღის წესრიგში მას შემდეგ დადგა, რაც იმუნიტეტი ეროვნული ბანკის საბჭოს წევრებმაც მოითხოვეს.
საპარლამენტო უმრავლესობის წევრი დავით ჭიჭინაძე აცხადებს, რომ ბანკის პოზიციიდან გამომდინარე მათ სამუდამო კომფორტის მიღების გარანტიები სჭირდებათ.
“ამ ქვეყანაში, სადაც კი რაღაც საბჭო შეიქმნება ყველას იმუნიტეტი ვერ მიენიჭება, იმუნიტეტი ვცდილობთ, ქვეყანაში სულ რამდენიმე პირს შეუნარჩუნდეს. გაუგებარია, რის ჩადენას აპირებენ ეს ადამიანები, რომ ასე დაჟინებით ითხოვენ იმუნიტეტს. მათ არ სჭირდებათ იმუნიტეტი და არა მარტო მათ, დეპუტატებსაც არ სჭირდებათ იმუნიტეტი. და ამ ინიციატივით გამოვალთ ალბათ და ამას დიდი წინააღმდეგობა არ ექნება, რადგან პარლამენტარები ისედაც ხალხის რჩეულები არიან და ზედმეტი დაცვის მექანიზმები არა საჭირო”, – განაცხადა დავით ჭიჭინაძემ პრესკონფერენციაზე.
ცნობისათვის, საქართველოს კონსტიტუციის შესაბამისად, პარლამენტის წევრის სისხლის სამართლის პასუხისგებაში მიცემა, დაკავება ან დაპატიმრება, მისი ბინის, მანქანის, სამუშაო ადგილის და პირადი გაჩხრეკა შეიძლება მხოლოდ პარლამენტის თანხმობით. კონსტიტუციური ნორმა დეპუტატს იმუნიტეტის მიღმა ტოვებს იმ შემთხვევაში, როცა მას წაასწრებენ დანაშაულის ჩადენის ფაქტზე. ამ შემთხვევაში, აღნიშნულის შესახებ დაუყოვნებლივ უნდა ეცნობოს პარლამენტს. თუ პარლამენტი არ მისცემს თანხმობას, პარლამენტის დაკავებული ან დაპატიმრებული წევრი დაუყოვნებლივ უნდა გათავისუფლდეს.
