სავალუტო აუქციონები კვირაში მხოლოდ ერთხელ გაიმართება. ეროვნული ბანკის გადაწყვეტილებით, სავალუტო აუქციონი კვირაში ორიდან ერთამდე შემცირდა და აუქციონის დღედ სამშაბათი განისაზღვრა.
სებ-ში აცხადებენ, რომ "იმის გათვალისწინებით, რომ ბოლო პერიოდში მნიშვნელოვნად გაიზარდა სავალუტო ბაზრის მოცულობა და გარიგებების სიხშირე, ეროვნული ბანკის გადაწყვეტილებით სავალუტო აუქციონის დღეები კვირაში ერთამდე შემცირდა. ეროვნული ბანკი ამ გადაწყვეტილებით არ ცვლის ინტერვენციების პოლიტიკას.
ამასთანავე, როგორც ადრე, საჭიროების შემთხვევაში გაიმართება რიგგარეშე აუქციონი".
შეგახსენებთ, რომ 2009 წლის მაისიდან თბილისის ბანკთაშორის სავალუტო ბირჟაზე ინტერვენციები სავალუტო აუქციონმა ჩაანაცვლა. აუქციონების შემოღებით შეიცვალა ოფიციალური გაცვლითი კურსის დადგენის მეთოდოლოგია და შემცირდა ყოველდღიური ინტერვენციების საჭიროება. თავდაპირველად აუქციონების დღეებად სამშაბათი და პარასკევი განისაზღვრა.