ნავთობპროდუქტების იმპორტიორთა კავშირის თავმჯდომარე ვანო მთვრალაშვილის განცხადებით, ბოლო წლების განმავლობაში საქართველოში რეგისტრირებული ავტოსატრანსპორტო საშუალებების რაოდენობა დინამკიურად იზრდება.
მისი თქმით, თუ 2005 წელს რეგისტრირებული იყო 414 425 ერთეული სატრანსპორტო საშუალება (მათ შორის: კვადრიციკლი და მოტოციკლი; მსუბუქი; სამგზავრო (ავტობუსი და მიკროავტობუსი); სასოფლო-სამეურნეო და სპეც. ნიშნულების; სატვირთო); 2006 წელს - 467 056 ერთეული; 2007 წელს - 519 676 ერთეული; 2008 წელს - 608 795 ერთეული და 2009 წელს - 654 286 ერთეული.
"ამ მონაცემების თანახმად ჩანს, რომ 2009 წელს ავტოსატრანსპორტო საშუალებების ოდენობა 2005 წელთან შედარებით 50 პროცენტზე მეტით გაიზარდა. პარალელურად ამისა, გაიზარდა საქართველოში ნავთობპროდუქტების იმპორტი. კერძოდ, 2005 წელს საქართველოში იმპორტირებულ იქნა 589 902,5 ტონა ბენზინისა და დიზელის საწვავი; 2006 წელს - 647 563,1 ტონა; 2007 წელს - 694 437,5 ტონა; 2008 წელს - 752 855,8 ტონა ; 2009 წელს - 828 453,4 ტონა. ანუ 2009 წლის მონაცემებით ბენზინისა და დიზელის საწვავის იმპორტი 2005 წლის მაჩვენებელთან შედარებით დაახლოებით 40 პროცენტით გაიზარდა", _ განაცხადა მთვრალაშვილმა და აღნიშნა, რომ ბოლო წლების განმავლობაში საქართველოში ეკონომიკური ვითარების გაუმჯობესებამ მნიშვნელოვნად გაზარდა ავტოსატრანსპორტო საშუალებების ოდენობა. მნიშვნელოვნადაა გაზრდილი ასევე საწვავის იმპორტი და შესაბამისად, მისი მოხმარება.
"ჩვენ ახლა გავაკეთეთ შედარება 2005 წლის მაჩვენებელთან, თუმცა აქვე უნდა აღვნიშნოთ, რომ უფრო ადრეულ წლებში (2002, 2003, 2004) ლეგალური საწვავის იმპორტი გაცილებით დაბალ მაჩვენებელზე იდგა. საწვავის იმპორტის გაზრდა გამოწვეულია, ერთი მხრივ იმით, რომ აღურიცხავ და კონტრაბანდულ საწვავს ჩაენაცვლა ლეგალურად იმპორტირებული საწვავი, რაც სახელმწიფოს უდაო დამსახურებაა და ამ მხრივ საქართველოს პოსტსაბჭოთა სივრცეში ყველაზე კარგი მაჩვენებელი აქვს. მეორე მხრივ, ეკონომიკური დონის განვითარებამ იმ ფონზე, რომ სატრანსპორტო საშუალებების რაოდენობა იზრდებოდა, გამოიწვია საწვავის მოხმარების ზრდა", _ განაცხადა მთვრალაშვილმა.