სააკაშვილის ოჯახის წევრებმა ლვოვი დატოვეს, - ამის შესახებ ინფორმაციას ,,რადიო თავისუფლება“ ავრცელებს. საქართველოს ექს-პრეზიდენტის, მიერ უკრაინაში დაარსებული პოლიტიკური ორგანიზაციის, „ახალ ძალთა მოძრაობის“ პრესმდივანმა მარიანა პოჩტარმა დაადასტურა, რომ ლვოვი დატოვეს მიხეილ სააკაშვილის ცოლმა, სანდრა რულოვსმა და უმცროსმა ვაჟმა, ნიკოლოზმა. პოჩტარმა სააგენტო unian-ს განუცხადა, რომ სააკაშვილის ცოლ-შვილი 11 სექტემბერს, საღამოს ლვოვიდან თვითმფრინავით გაემგზავრა, თუმცა სად, არ დაუზუსტებია.
უკრაინის სასაზღვრო სამსახურის წარმომადგენელმა ოდესის საოლქო ადმინისტრაციის ყოფილ ხელმძღვანელს, საქართველოს ყოფილ პრეზიდენტს, მიხეილ სააკაშვილს ქალაქ ლვოვის სასტუმრო „ლეოპოლისთან“ წაუკითხა ადმინისტრაციული ოქმი სახელმწიფო საზღვრის დარღვევის შესახებ. თავად მიხეილ სააკაშვილმა განაცხადა, რომ კანონის თანახმად, მისთვის ოქმი უნდა გადაეცათ სავარაუდო დარღვევიდან სამი საათის განმავლობაში, ამიტომ სასაზღვრო სამსახურის დღევანდელი ქმედება უკანონოა. მესაზღვრის შეკითხვას, შეუძლია თუ არა წარმოადგინოს პირადობის დამადასტურებელი დოკუმენტი, მიხეილ სააკაშვილმა უპასუხა, რომ უკრაინის პასპორტი, რომელიც 10 სექტემბერს მოპარეს, ამჟამად პრეზიდენტის, პეტრო პოროშენკოს კაბინეტშია.
