წარსულს ჩაბარდა დრო, როდესაც კანონპროექტებში მესამე მოსენის დროს არარედაქციული ცვლილებები შეჰქონდათ, - ამის შესახებ პარლამენტის თავმჯდომარემ, ირაკლი კობახიძემ ბიუროს დღევანდელ სხდომაზე განაცხადა.
ირაკლი კობახიძემ იმ ცვლილებების შესახებ ისაუბრა, რომლებიც კონსტიტუციაში შევიდა.
„დღეს გავრცელდა დეზინფორმაცია კანონპროექტთან დაკავშირებით. დეზინფორმაცია ეხებოდა იმას, თითქოს გარკვეული საკითხები არის ჩასწორებული კონსტიტუციაში განსხვავებით მეორე მოსმენით დარიგებული დოკუმენტისგან. სინამდვილე არის შემდეგში: არის ოთხი ცვლილება. ოთხივე ცვლილება არის შეტანილი დოკუმენტში იმ შენიშვნების მიხედვით, რომელიც გამოითქვა პლენარულ სხდომაზე. ერთი არის ტექნიკური ცვლილება ღირსების უფლების შესახებ მუხლის სათაურზე. „ადამიანის ღირსების ხელშეუვალობა“ დაერქვას შესაბამის მუხლს. ამ შემთხვევაში ბატონი ანრი ოხანაშვილი იყო შესაბამისი შენიშვნის ავტორი. ასევე, მორიგი შენიშვნა ეხებოდა ჯანმრთელობის დაცვის უფლებას. აქ ბატონი აკაკი ზოიძის ინიციატივა იყო ფორმულირების დახვეწა და შესაბამისი ფორმულირება შეიცვალა ინიციატივის შესაბამისად. ასევე შეიცვალა ფორმულირება, რომელიც ეხებოდა იუსტიციის უმაღლესი საბჭოს თავმჯდომარის არჩევის წესს. აქ იყო ბატონი გიორგი ხატიძის ინიციატივა, რომ დაკონკრეტებულიყო ორგანული კანონის დათქმა, ანუ მითითება დაემატა ნორმას იმის თაობაზე, რომ ორგანული კანონით დადგენილი წესით აირჩევა იუსტიციის უმაღლესი საბჭოს თავმჯდომარე და ბოლოს, მეოთხე საკითხი, რომელიც იყო გაზიარებული - იყო თამარ ხულორდავას ინიციატივა, რომელიც ეხებოდა პრეზიდენტის არჩევას 6 წლის ვადით. ეს არის გარდამავალ დებულებებში ასახული შესაბამისი ნორმა. ეს ცვლილება ეფუძნებოდა იმ მოსაზრებას, რომ ირჩევა პროპორციული წესით პირველად საქართველოს პარლამენტი 2024 წელს და სასურველი იყო, ამის შემდეგ არჩეულიყო პრეზიდენტი ახალი, არაპირდაპირი წესით, 300 ხმოსნის მიერ. ეს იყო ოთხი შენიშვნა, რომელიც გამოთქვა პლენარულ სხდომაზე და რომელიც გაზიარებულ იქნა ჩემს მიერ, როგორც მომხსენებლის მიერ. აქედან გამომდინარე, სამწუხაროდ, დეზინფორმაცია გავრცელდა. წარსულს ჩაბარდა ის დრო, როდესაც მესამე მოსენის დროს არარედაქციული ცვლილებები შეჰქონდათ დოკუმენტში და აპარებდნენ დოკუმენტში გარკვეულ ცვლილებებს. გახსოვთ 2010 წელს, მაშინდელი მოწვევის პარლამენტმა როცა მიიღო საკონსტიტუციო ცვლილები, მესამე მოსმენის დროს შევიდა არაერთი არასარედაქციო ცვლილება დოკუმენტში. ფუნდამენტურად გადაისინჯა მაშინ დოკუმენტი. ეს არის ის რეალობა, რომელიც ჩავაბარეთ წარსულს. ასეთი მანიპაულაციები არ არის დამახასიათებელი ჩვენთვის“ - განაცხადა ირაკლი კობახიძემ.
