ცენტრალურმა საარჩევნო კომისიამ ალექსანდრე ელისაშვილი თბილისის მერობის კანდიდატად ოფიციალურად დაარეგისტრირა.
ამის შესახებ მერობის დამოუკიდებელმა კანდიდატმა თავად განაცხადა და დასძინა, რომ ხალხთან ერთად მნიშვნელოვანი გამარჯვების მიღწევის იმედი აქვს.
როგორც ელისაშვილმა აღნიშნა, ოქტომბრის არჩევნებში მისი გამარჯვების შემთხვევაში "ქართული ოცნების" საბოტაჟის რეჟიმში გადასვლა გამორიცხულია.
"შემჭიდროებულ ვადებში 10 000 ხელმოწერის მიტანა მომთხოვეს და ჩვენ ორჯერ უფრო მეტი, 20 ათასი ხელმოწერა მივიტანეთ. ხელისუფლება იძულებული გახდა ხალხის არნახული ენთუზიაზმისთვის ანგარიში გაეწია და ხალხის მხარდაჭერამ თავისი გაიტანა. ჩვენ წინასაარჩევნო პერიოდი ერთის მხრივ ხელისუფლების გეგმა ჩავშალეთ, რომ ბიუროკრატიული ხერხებით საარჩევნო პროცესის მიღმა დავრჩენილიყავი და მეორეს მხრივ ერთ მცირე, მაგრამ ძალიან მნიშვნელოვან გამარჯვებას მივაღწიეთ.
ჩემი გამარჯვების შემთხვევაში გამოვრიცხავ, რომ " ქართული ოცნება" საბოტაჟის რეჟიმში გადავიდეს, რადგან თუ გავიმარჯვებ, ვერავინ გაბედავს მილიონნახევრიანი ქალაქის პირდაპირ არჩეულ მერს, ისეთი "მაიმუნობები" დაუწყონ, როგორიც ერთხელ იყო. მაშინ აბსოლუტურად სხვა პოლიტიკური რეალობა იყო. ვიცი როგორ ვითანამშრომლო საკრებულოსთან, იქ ვმუშაობ და ვიცი საკრებულო როგორ მუშაობს",- განაცხადა ალექსანდრე ელისაშვილმა.
