ყველაზე მძიმე დარღვევა დემირელის სკოლის შემთხვევაში იყო ის, რომ თურქულ სექტორზე დოკუმენტაციაში ფიქსირდებოდნენ მოსწავლეები, რომლებიც რეალურად საქართველოში არ ყოფილან, - ამის შესახებ ვიცე-პრემიერმა, განათლებისა და მეცნიერების მინისტრმა ალექსანდრე ჯეჯელავამ დემირელის სკოლისთვის ავტორიზაციის გაუქმების საკითხის კომენტირებისას განაცხადა.
მინისტრის განცხადებით, ყველა სკოლა უნდა დაემორჩილოს კანონის მოთხოვნებს.
„მეორე მხრივ, უნდა ვთქვათ, რომ წელიწადში 10-15 სკოლა ვერ იღებს ავტორიზაციას, ანუ სამწუხაროა, რომ ჯერ კიდევ არის კერძო სკოლები, სადაც დამფუძნებლები და მენეჯმენტი კანონის მოთხოვნებს ცოტა მსუბუქად უდგებიან. ნებისმიერი სკოლა, მიუხედავად მისი პროფილისა და განათლების ხარისხისა, ძალიან სერიოზულად უნდა მიუდგეს კანონების მოთხოვნებს“, - განაცხადა ალექსანდრე ჯეჯელავამ.
დემირელის სახელობის სკოლამ ავტორიზაციის 5-წლიანი ვადის ამოწურვის შემდეგ ავტორიზაციის საბჭოს კვლავ მიმართა, თუმცა, სკოლამ 29 აგვისტოს, სხვადასხვა მიზეზით ავტორიზაციაზე უარი მიიღო.
