პრემიერ-მინისტრმა, პარტია „ქართული ოცნება-დემოკრატიული საქართველოს“ თავმჯდომარე გიორგი კვირიკაშვილმა დღეს, რაჭა-ლეჩხუმისა და ქვემო სვანეთის რეგიონის მერობის კანდიდატები წარადგინა.
გიორგი კვირიკაშვილის თქმით, დღევანდელი არჩევანი განაპირობებს რაჭა-ლეჩხუმისა და ქვემო სვანეთის ყოველი ქალაქისა და ყოველი სოფლის განვითარებას.
"ქართულმა ოცნებამ" ამ წლების განმავლობაში მნიშვნელოვანი ნაბიჯები გადადგა, რათა ხალხს ეგრძნო შვება და იმისათვის, რომ თითოეული ჩვენგანის ოჯახის მდგომარეობა გაუმჯობესებულიყო. ჯანდაცვისა და სოციალურმა პროგრამებმა მთლიანად შეცვალა ამ მხრივ ადამიანების ყოფა. ჩვენ ძალიან ბევრი გავაკეთეთ და გავაგრძელებთ კეთებას სოფლის მეურნეობის მიმართულებით წარმოების ხელშეწყობისათვის და ამაზე მეტყველებს ჯერ არნახული პროექტები, რომლებიც ხორციელდება საქართველოს ყველა კუთხეში. ეს პროექტები არის უპრეცედენტო დამოუკიდებელი საქართველოს ისტორიაში. ჩვენ ვიცით, რომ ეს არ არის საკმარისი და საჭირო უფრო მეტი მასშტაბის გაფართოება, რათა ყველამ იგრძნოს ის ახალი შესაძლებლობა, რომელიც საქართველოში იქმნება ამ მიმართულებით. იმისათვის, რომ ქვეყანა სწრაფად განვითარდეს უნდა შეიქმნას მეტი საწარმო. ჩვენ დავიწყეთ მთავრობის ოთხპუნქტიანი გეგმა და ამ გეგმის საშუალებით დიდი ცვლილებები უნდა შეიტანოთ საქართველოს რეგიონებში. მჯერა, რომ ამ მიზნის განხორციელებაში ჩვენ გვერდით დადგებით. ჩვენ გავაკეთეთ ის, რომ ამბროლაურს ჰქონოდა საერთაშორისო სტანდარტების ძალიან კარგი რეგიონული აეროპორტი. უკვე რამდენიმე თვეა ამბროლაურის აეროპორტი ამუშავდა და ძალიან სასიხარულოა, რომ მგზავრთა რაოდენობა იმდენად გაიზარდა, რომ რეისის დამატებაც კი მოგვიწია", - განაცხადა გიორგი კვირიკაშვილმა.
პრემიერმა ინფრასტრუქტურის განვითარების აუცილებლობაზე ისაუბრა და თქვა, რომ ამბროლაურის აეროპორტი არ არის ერთი ცალკე აღებული პროექტი, ეს არის ახალი პერსპექტივა რეგიონისთვის.
"მნიშვნელოვანია, რომ ქვეყანას ჰქონდეს სწორი სივრცითი მოწყობა. გამართული ინფრასტრუქტურა და განვითარებული მეწარმეობა. ეს არის ის, რაც განაპირობებს ჩვენი ხალხის კეთილდღეობას. სწორედ ამ გეგმას მივყვებით ჩვენ და მჯერა, რომ ამ ყველაფრის ერთობლიობა გამოაცოცხლეს რაჭას, ლენტეხს. ჩვენ დიდი გეგმები გვაქვს და ვაპირებ უპრეცედენტო ინფრასტრუქტურული პროექტების განხორციელებას. მთელ საქართველოში იგება გზები, შენდება ახალი აეროპორტრები, ხიდები, ესტაკატები და გვირაბები . დღეს ჩვენ გვაქვს მიუვალი სოფლები და ამ გეგმის განხორციელებით გადავჭრით ამ პრობლემას. წელს ჩვენ უკვე დავიწყებთ საჩხერისა და რაჭის შემაერთებელი პირველი მონაკვეთის მშენებლობას, რომელიც ახალ შესაძლებლობას გააჩენს რაჭისთვის. ეს არის ის პროექტი, რომელიც დედაქალაქთან კავშირს გაამარტივებს., ჩვენ ვმუშაობთ პროექტებზე და ქუთაისის, ლეჩხუმის ზემო და ქვემო სვანეთის შემაერთებელი გზის მშენებლობაც დასრულდება", - განაცხადა გიორგი კვირიკაშვილმა.
