4 სექტემბერს, PMC კვლევითი ცენტრის ორგანიზებით, საქართველოს ინოვაციების და ტექნოლოგიების სააგენტოსთან პარტნიორობით, ტექნოპარკში “ქართულ-გერმანული სტარტაპ ფორუმი” გაიმართება.
ღონისძიება ხორციელდება საქართველო-გერმანიის წლის ფარგლებში, გერმანიის საელჩოს და პროკრედიტ ბანკის მხარდაჭერით და მისი მთავარი მიზანი ინოვაციების და მეწარმეობის შესახებ ცოდნის და გამოცდილების გაზიარებაა.
ფორუმს გახსნიან გიორგი ჩერქეზიშვილი, ეკონომისა და მდგრადი განვითარების მინისტრის მოადგილე, მისი აღმატებულება დოქტორი ჰაიკე ფაიჩი, გერმანიის ფედერაციული რესპუბლიკის ელჩი საქართველოში, ალექსი ალექსიშვილი, საკონსულტაციო კომპანია PMCG-ის გენერალური დირექტორი და გიორგი ზვიადაძე, საქართველოს ინოვაციების და ტექნოლოგიების სააგენტოს თავმჯდომარე. ღონისძიებას მოდერაციას გაუწევენ Colin Donohue (მენეჯერი, სამეწარმეო სტრატეგიის სპეციალისტი) და გიორგი ლალიაშვილი (ინოვაციების და ტექნოლოგიების სააგენტოს სტრატეგიული განვითარების მთავარი სპეციალისტი).
ფორუმის ფარგლებში, წამყვანი გერმანელი მეწარმეები - Michael Huebl (flinc GmbH), Wolfgang Bernecker (Pandata GMPH) და Stephan Dabels (AmbiGateGmbH), რომლებსაც სტარტაპების შექმნის და მართვის მრავალფეროვანი გამოცდილება აქვთ, გაუზიარებენ ადგილობრივ სტარტაპერებს თავიანთ გამოცდილებას, იმსჯელებენ წარმატების და წარუმატებლობების მიზეზებზე, ასევე გლობალური ტენდენციებზე.
5 სექტემბერს, ადგილობრივ სტარტაპერებს საშუალება ექნებათ პირისპირ შეხვდნენ სპიკერებს B2B შეხვედრების ფორმატში, რაც საშუალებას მისცემს მათ უფრო კარგად გააცნონ ერთმანეთს თავიანთი წამოწყებები და განიხილონ თანამშრომლობის შესაძლებლობები.
“ვფიქრობთ, რომ მსგავსი ფორუმები ძალიან მნიშვნელოვანია, ორ ქვეყანას შორის როგორც ცოდნის, გამოცდილების და ტექნოლოგიების გაზიარებისთვის, ასევე პარტნიორული ურთიერთობების ჩამოყალიბებისთვის. ვიმედოვნებთ, რომ ქართული კომპანიები სასარგებლო ცოდნას და გამოცდილებას შეიძენენ გერმანული კომპანიებისგან და შეძლებენ მათთან სტრატეგიული თანამშრომლობის განვითარებას”, განმარტავს მიხეილ სხიერელი, პროექტის მენეჯერი PMC კვლევითი ცენტრიდან.
ადგილობრივ სტარტაპერებთან ერთად, ღონისძიებას დაესწრებიან გერმანიის საელჩოს, ეკონომიკისა და მდგრადი განვითარების სამინისტროსა და საერთაშორისო ორგანიზაციებისა და ინსტიტუტების წარმომადგენლები.
