ბრიტანელმა ჟურნალისტმა ჯოზეფ ალექსანდერ სმიტმა, რომელიც წლებია საქართველოში ცხოვრობს, შესაძლოა საკრებულოს წევრობაზე კენჭი დამოუკიდებელ კანდიდატად იყაროს, - ამის შესახებ ის Facebook-ის პირად გვერდზე წერს.
მისი ინფორმაციით, ის საბურთალოს ერთ-ერთ მაჟორიტარულ ოლქში დამოუკიდებელ უპარტიო კანდიდატად აპირებს კენჭისყრას, თუმცა, მისივე ინფორმაციით, არჩევნებში მონაწილეობის მისაღებას მას 441 ხელმოწერა სჭირდება.
"ძვირფასო მეგობრებო, აქამდე ჩემი გეგმების გამჟღავნებისგან თავს ვიკავებდი, მაგრამ დადგა დრო, რომ გითხრათ რა ხდება და დახმარებაც გთხოვოთ.
საკრებულოს არჩევნებში ვაპირებ კენჭისყრას, საბურთალოს ერთ-ერთ მაჟორიტარულ ოლქში დამოუკიდებელ უპარტიო კანდიდატად. ხუთი დღის წინ გავიარე კონსულტაცია შესაბამის საოლქო საარჩევნო კომისიაში, და მითხრეს, რომ ძალიან გამიჭირდება კანდიდატად რეგისტრაცია, რადგან კანდიდატი საქართველოში უნდა იყოს ნაცხოვრები 5 წელი რეგისტრაციის ბოლო ვადამდე და მე თითქმის ერთი თვე მაკლდება.
თუმცა საბოლოო პასუხი ჯერ არ მიმიღია ამ ხუთწლიანი ცხოვრების ცენზთან დაკავშირებით და მაინც ვაპირებ ყველა მოთხოვნილი დოკუმენტის წარდგენას.
სასწრაფოდ შესაგროვებელი მაქვს საბურთალოს N. 03.05 ერთმანდატიან მაჟორიტარულ ოლქში რეგისტრირებულ ამომრჩეველთა ხელმოწერები - 441 ხელმოწერა მჭირდება 1 სექტამბრამდე", - წერს სმიტი.
ჯოზეფ ალექსანდერ სმიტმა ხელმოწერების შეგროვება უკვე დაიწყო.
