ნამდვილად არადამაკმაყოფილებელია მძღოლების ცალკეული საქციელი და თითოეული მათგანი უნდა დაისაჯოს, - ამის შესახებ თბილისის მერმა ჟურნალისტებს განუცხადა. დავით ნარმანია მიკროავტობუსის მძღოლისა და მგზავრის ფიზიკურ დაპირისპირებას გამოეხმაურა, რომლის ამსახველი ვიდეომასალაც დღეს სოციალურ ქსელში გავრცელდა.
"სამწუხაროდ, ყვითელი მიკროავტობუსების გარკვეულ ნაწილში კონდიციონერები არ არის გამართულ მდგომარეობაში, შესაბამისად, ის არ მუშაობს. ვატარებთ მონიტორინგს და ბოლო პერიოდში განხორციელებული მონიტორინგის შედეგად, კონდიციონერების მხოლოდ ერთ მესამედამდია ჩართული. ჩვენ ვაფრთხილებთ სატრანსპორტო კომპანიას, რომ უფრო მეტად მიაქციონ ყურადღება მანქანების გამართულობას და მძღოლების ცალკეულ ქმედებას. ნამდვილად არადამაკმაყოფილებელია მძღოლების ცალკეული საქციელი და შეურაცხყოფის მიყენება მოქალაქეებზე. თითოეული მათგანი უნდა დაისაჯოს. სამწუხაროა ის, რომ ჩვენი წინამორბედების მიერ გაფორმებული ხელშეკრულებით, თბილისის მერიას ძალიან მკაცრი მექანიზმების გატარების საშუალება არ აქვს", - განაცხადა თბილისის მერმა.
