ჩვენ ჯერ ოფიციალურად არც კი ჩავრთულვართ საარჩევნო პროცესში და მიუხედავად ამისა, ქვეყანაში არსებობენ ადამიანები, რომლებიც არათუ მხარს გვიჭერენ, არამედ ჩვენი არჩევნებში გამარჯვებისაც კი სჯერათ, - ამის შესახებ "გირჩის" განცხადებაშია აღნიშნული, რომელიც NDI-ს ახალ კვლევებს ეხება.

როგორც განცხადებაში წერია, განსაკუთრებით აღსანიშნავია, რომ საქართველოს მოქალაქეთა მხოლოდ 1% აცხადებს, რომ გირჩს არასოდეს მისცემს ხმას. 

"გუშინ გამოქვეყნდა NDI-ს მიერ ჩატარებული სოციოლოგიური კვლევის შედეგების პოლიტიკური ნაწილი.

საქართველოში (და შეიძლება სხვაგანაც) დამკვიდრებულია ტრადიცია, რომ ყოველი ასეთი კვლევის შედეგები ოპოზიციურმა პარტიებმა უნდა „თარგმნონ“ მათთვის მომგებიანად და ეცადონ საკუთარ მხარდამჭერებში გააღვივონ მაქსიმალური ოპტიმიზმი (ბარემ გეტყვით, რომ ქართულ პოლიტიკურ კულუარებში ამ პროცესს „მხარდამჭერებისთვის აყენებას“ ეძახიან).

გთავაზობთ ასეთი „აყენების“ გირჩისეულ ვერსიას:

NDI-ს კვლევამ ნათლად აჩვენა, რომ ადგილობრივი არჩევნებისთვის ხელისუფლების რეიტინგი იმდენად დაბალია, რომ სახელისუფლებო კანდიდატები, მათ შორის, პირველ რიგში თბილისში, ვერ შეძლებენ გამარჯვების მოპოვებას პირველ ტურში. მეორე ტურში კი მათი მარცხი გარდაუვალია!

გირჩს აქვს ძალიან კარგი სტარტი. ჩვენ ჯერ ოფიციალურად არც კი ჩავრთულვართ საარჩევნო პროცესში და მიუხედავად ამისა, ქვეყანაში არსებობენ ადამიანები, რომლებიც არათუ მხარს გვიჭერენ, არამედ ჩვენი არჩევნებში გამარჯვებისაც კი სჯერათ! (დიდება მათ ოპტიმიზმს! :) )

ბოლო 1 წლის განმავლობაში ჩვენ წარმატებით გავუმკლავდით მთავარ გამოწვევას - გირჩის დაბალ ცნობადობას. დღეს გირჩს იცნობს პრაქტიკულად ყველა! (ძირითადად გვაგინებენ, მაგრამ სიძულვილიდან სიყვარულამდე 1 ნაბიჯიაო, თუ როგორც არის).

განსაკუთრებით აღსანიშნავია შემდეგი - საქართველოს მოქალაქეთა მხოლოდ 1% აცხადებს, რომ გირჩს არასოდეს მისცემს ხმას. მხოლოდ 1%! After all we've said and done!

ახლა ჩვენთვის მნიშვნელოვანია, ეს ცნობადობა გადავზარდოთ პარტიულ რეიტინგში. კვლევა აჩვენებს, რომ ამისთვის გვაქვს მნიშვნელოვანი წინაპირობა - მოქალაქეების 62%-ს ჯერ კიდევ არ გადაუწყვეტია ვის მისცემს ხმას.

გაუმარჯოს დამოუკიდებელ საქართველოს!", - წერია განცხადებაში.