სამწუხარო და ყოვლად მიუღებელია, რომ მაშინ როდესაც პარლამენტის თავმჯდომარისგან მოვისმინეთ მყარი არგუმენტები პრეზიდენტის შენიშვნებზე, ამის საპირისპიროდ, პრეზიდენტის საპარლამენტო მდივნისგან მივიღეთ შეურაცხყოფა, ისეთ ტონალობაში, რაც სხვა არაფერია თუ არა სიძულვილის ენით საუბარი, - ამის შესახებ საპარლამენტო უმრავლესობის წევრმა გიორგი ხატიძემ განაცხადა.
მისი თქმით, ანა დოლიძემ არა მხოლოდ პირადად პარლამენტის თავმჯდომარე, არამედ საქართველოს პარლამენტის, როგორც მნიშვნელოვანი სახელმწიფო ინსტიტუტი შეურაცხყო. მისივე თქმით, უფრო მეტიც, მან შეურაცხყო საქართველოს პარლამენტის თითოეული წევრი.
"ჩვენი ოპონენტებისგან პერიოდულად გვესმის ჩვენი გუნდის ზღვარგადასული შეურაცხყოფა და ყოვლად მიუღებელი კრიტიკა. ამჯერად, ეს ჩვენ მოვისმინეთ ქალბატონი დოლიძისგან, რომელიც პრეზიდენტის საპარლამენტო მდივანია. მიუღებელია მით უმეტეს საპარლამენტო მდივნისგან მსგავსი განცხადებები", - აღნიშნა მან.
შეგახსენებთ, ანა დოლიძემ პარლამენტის თავმჯდომარე ირაკლი კობახიძის მისამართით განაცხადა, რომ ის არის უზრდელი, თანამდებობისთვის შეუფერებელი და ქართული პოლიტიკის „შარიკოვი“.
