დიდ დიღომში მშენებარე კორპუსში მომხდარი უბედური შემთხვევის ადგილას შრომის ინსპექციის თანამშრომლებმა მუშაობა დაასრულეს.
პირველადი დასკვნის თანახმად, მშენებლობაზე უსაფრთხოების ნორმები არ იყო დაცული.
„პირველადი დათვალიერებით დარღვეულია უსაფრთხოების ნორმები. არ იყო გათვალისწინებული და დაცული კოლექტიური და ინდივიდუალური დაცვის საშუალებები. რაც შეეხება საბოლოო მოკვლევას, დასკვნას შევადგენთ და იქნება გადაცემული ორგანიზაციაზე. პასუხისმგებლობის საკითხს ჩვენ არ განვსაზღვრავთ, ეს შესაბამისმა ორგანოებმა უნდა განსაზღვრონ,“ - განაცხადეს შრომის ინსპექციის წარმომადგენლებმა.
შრომის ინსპექციის დასკვნა სამართალდამცავ ორგანოებს გადაეცემათ. სწორედ ამის შემდეგ გახდება ცნობილი, დადგება თუ არა სამშენებლო კომპანიის ხელმძღვანელობის პასუხისმგებლობის საკითხი.
მედიასთან კომენტარს არ აკეთებენ სამშენებლო კომპანიის წარმომადგენლები.
შეგახსენებთ, რომ დიდ დიღომში, დავით აღმაშენებლის ხეივნის მიმდებარე ტერიტორიაზე მშენებლობიდან მამაკაცი გადმოვარდა და დაიღუპა.
მომხდარზე გამოძიება სსკ-ის 240-ე მუხლით მიმდინარეობს, რაც სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს.
