საქართველოს პრემიერ-მინისტრი გიორგი კვირიკაშვილი ირლანდიის საპარლამენტო დელეგაციას შეხვდა.
მხარეებმა ორი ქვეყნის ურთიერთობების ფართო სპექტრი განიხილეს. საუბარი შეეხო სავაჭრო-ეკონომიკური თანამშრომლობის კუთხით არსებულ შესაძლებლობებს, ასევე, სოფლის მეურნეობის, კულტურის, საგანმანათლებლო და ტურიზმის სფეროებში ურთიერთობების განვითარების პერსპექტივებს.
მხარეებმა ისაუბრეს საქართველოს ევროპული და ევროატლანტიკური ინტეგრაციის პროცესებზე და ხაზი გაუსვეს ამ მიმართულებით მიღწეულ პროგრესს.
შეხვედრაზე განიხილეს რეგიონალური უსაფრთხოების საკითხები და საქართველოს ოკუპირებულ ტერიტორიებზე არსებული ვითარება. ირლანდიის საპარლამენტო დელეგაციის წევრებმა გამოხატეს მტკიცე მხარდაჭერა საქართველოს ტერიტორიული მთლიანობისა და სუვერენიტეტის მიმართ.
