მერიის უშტატო თანამშრომელ ოთარ აბესაძეს, რომელიც გუშინ ქრთამის აღების ფაქტზე დააკავეს, ბრალი დღეს, დღის მეორე ნახევარში წარედგინება.
როგორც დაკავებულის ადვოკატმა, ირმა ჭკადუამ განაცხადა, აბესაძე ბრალს არ აღიარებს და დამამშვიდებელი აქვს მიღებული.
„ბრალი მისთვის არ წარუდგენიათ შესაბამისად, არანაირი ბრალის აღიარებაზე საუბარი არ არის. მას მიცემული აქვს დამამშვიდებელი წამლები, ვინაიდან მასთან ახლა ექიმია. აბესაძესთან დიალოგი პრაქტიკულად შეუძლებელი იყო. იმყოფება ძალიან აღელვებულ მდგომარეობაში.
13 ივლისს, დღის პირველ ნახევარში აუცილებლად მოხდება ბრალის წარდგენა. შემდგომ უკვე საქმე გადაინაცვლებს სასამართლოში. შესაძლებელია, 13 ივლისს მოხდეს სასამართლოზე მისი პირველი წარდგენა“, - განაცხადა ირმა ჭკადუამ.
შეგახსენებთ, რომ საქართველოს სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა ჩატარებული ოპერატიულ-სამძებრო და საგამოძიებო მოქმედებების შედეგად, ქრთამის აღების ფაქტზე თბილისის მუნიციპალიტეტის მერიის უშტატო თანამშრომელი - ოთარ აბესაძე გუშინ დააკავეს.
