გიორგი მამალაძემ ბარგის ჩხრეკისას სცადა შეუმჩნევლად გადაედო გვერდზე ის ნივთი, სადაც ნატრიუმის ციანიდს მალავდა, - ამის შესახებ პროკურორმა ზვიად გუბელაძემ დღევანდელი სასამართლო პროცესის დასრულების შემდეგ განაცხადა.
მისი თქმით, გამომძიებლებმა გაიხსენეს, რომ ბრალდებულმა თავად ამოიღო ტანსაცმლის საწმენდი ნივთი, რომელიც საკუთარი ინიციატივით დაშალა, შემდეგ ამოიღო ფეხსაცმლის საწმენდი სპრეი, რომლის გვერდზე გადადებას შეეცადა გაუხსნელად, თუმცა, გამომძიებლების მოთხოვნის შემდეგ მოხადა თავი, საიდანაც გადმოვარდა პოლიეთილენის პარკში გახვეული ნატრიუმის ციანიდი.
მისივე ინფორმაციით, ამის შემდეგ ბრალდებულმა დამსწრე ადვოკატს განუცხადა, რომ ყველაფერი დამთავრებული იყო და მისი დახმარება არ სჭირდებოდა. მისივე თქმით, რამდენიმე წუთის შემდეგ კი ადვოკატთან გაიარა კონსულტაცია და მხოლოდ საგამოძიებო მოქმედების დასრულების შემდეგ მოიფიქრა, თითქოსდა ეს ნივთიერება მისი არ იყო.
როგორც პროკურორმა აღნიშნა, სასამართლო სხდომაზე გამოკვლეული იყო ბარგის დათვალიერების ოქმი, რომლითაც დადგინდა, რომ ლუქისა და პოლიეთილენის პარკის მთლიანობა დარღვეული არ ყოფილა.
მისივე განმარტებით, სახელმწიფო ბრალდებისთვის მთავარი ის გარემოებაა, რომ ლუქისა და პოლიეთილენის პარკის მთლიანობა ურღვევი იყო.
"9 საათი უტრირებაა ადვოკატების მხრიდან. პირველ რიგში მოხდა ბრალდებულის დაკავება და ჩატარდა პირადი ჩხრეკა. ამის შემდეგ დაიკითხა ბრალდებული, რა დროსაც მან დუმილის უფლება გამოიყენა, შემდეგ უკვე გამოძახებული იყო მოწმე, რომლის თანდასწრებით ბარგის ამოღება უნდა მომხდარიყო, სანამ მოწმე მოვიდა, ბრალდებულმა მოითხოვა სასწრაფო დახმარება, რადგან განაცხადა, რომ შეუძლოდ იყო, შემდეგ მოითხოვა ადვოკატი, რომელმაც საათნახევარი-ორი საათი დააგვიანა და როგორც კი ყველა შეიკრიბა, დაიწყო ბარგის დათვალიერება. დროს არავითარი მნიშვნელობა არ აქვს, რადგან ბარგის ლუქის მთლიანობა არ იყო დარღვეული", - განაცხადა ზვიად გუბელაძემ.
