საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს იმ გადაწყვეტილებას, რომლის მიხედვითაც დემირელის კოლეჯის დაკავებულ მენეჯერს, მუსტაფა ემრე ჩაბუქს ლტოლვილის სტატუსი არ მიენიჭა, მისი უფლებადამცველები ყველა ინსტანციაში გაასაჩივრებენ. ამის შესახებ ”ჯი-ეიჩ-ენს” ჩაბუქის ადვოკატმა, ვახო კვიჟინაძემ განუცხადა.
”ადვოკატების დახმარებით ჩაბუქი ბრძოლას ბოლომდე გააგრძელებს. ჯერ პირველი ინსტანციის სასამართლოში გავასაჩივრებთ, თუ იქაც უარყოფითი გადაწყვეტილება მიიღეს, მეორე ინსტანციაშიც გავასაჩივრებთ. ასევე, მივმართავთ ადამიანის უფლებათა ევროპულ სასამართლოს,” - განაცხადა ვახო კვიჟინაძემ.
ადვოკატის თქმით, სამინისტროს მხრიდან უარის თქმის საფუძველი არ არსებობდა.
”როგორც პროკურატურაში, ასევე ლტოლვილთა და განსახლების სამინისტროში წარვადგინეთ პირდაპირი მტკიცებულები, რომლის მიხედვითაც მუსტაფას და მის ოჯახს სოციალურ ქსელში თურქეთიდან ემუქრებოდნენ, რომ მათ თურქეთში ჩასვლისთანავე ფიზიკურად გაანადგურებდნენ. ამ ყველაფრის გათვალისწინებით, რა თქმა უნდა, ველოდით, რომ ლტოლვილის სტატუსს მიანიჭებდნენ. ეს მოლოდინი კი საფუძვლიანი იყო,” - განუცხადა ”ჯი-ეიჩ-ენს” ადვოკატმა.
ლტოლვილთა სამინისტროს მიერ გავრცელებულ განცხადებაში ნათქვამია, რომ მუსტაფა ემრე ჩაბუქის პერსონალური მონაცემების დაცვისა და კონფიდენციალურობის მოტივით უწყება გადაწყვეტილების შინაარს და არგუმენტაციას არ ასაჯაროებს. თუმცა, აღნიშნული არგუმენტაცია ჩაბუქის ადვოკატებისთვის ცნობილია. მათ დასაბუთებული გადაწყვეტილება უკვე გადაეცათ. ისინი აღნიშნულთან დაკავშირებით ორშაბათს პრესკონფერენციას ჩაატარებენ.
რაც შეეხება იმას, დაუნიშნავენ თუ არა მუსტაფა ემრე ჩაბუქის ოჯახს სპეციალურ დაცვას, ადვოკატს პროგნოზის გაკეთება უჭირს.
”განცხადება პროკურატურაში შეტანილია, მაგრამ ჯერ გადაწყვეტილება არ მიუღიათ. იმ გარემოებებიდან გამომდინარე, რაც არსებობს, დაცვა აუცილებლად უნდა დაუნიშნონ,” - აცხადებს კვიჟინაძე.
