დღეს დაიკითხნენ საპატრიარქოს უსაფრთხოების სამსახურის თანამშრომლები, მიუხედავად იმისა, რომ მათ ბრალდებულთან მეგობრული ურთიერთობა აქვთ, ვერ დამალეს, რომ მამალაძე მკვეთრად უარყოფით დამოკიდებულებაში იყო შორენა თეთრუაშვილთან, - ამის შესახებ ე.წ ციანიდის საქმის პროკურორმა ზვიად გუბელაძემ ჟურნალისტებს განუცხადა.
მისი თქმით, მოწმეებმა ისაუბრეს, რომ დეკანოზი ხელფასს იღებდა იმ კომპანიიდან, რომლის დამფუძნებელიც მისი მეგობარი იყო.
"მიუხედავად იმისა, რომ მათ ბრალდებულთან მეგობრული ურთიერთობა აქვთ, ვერ დამალეს, რომ მამალაძე მკვეთრად უარყოფით დამოკიდებულებაში იყო შორენა თეთრუაშვილთან, მის მიმართ ახორციელებდა ცინიკურ დამოკიდებულებას და მიიჩნევდა მას კარიერული წინსვლის დამაბრკოლებელ გარემოებად. მოწმეებმა ასევე ისაუბრეს დეკანოზის მერკანტილურ დამოკიდებულებაზე საპატრიარქოს კლინიკასთან დაკავშირებით. თუ როგორი ანგარებითი დამოკიდებულება ჰქონდა მას (დეკანოზს) და როგორ გაათავისუფლებინა სპეციალურად გენერალური დირექტორი, რათა მისი ადგილი დაეკავებინა. ასევე მოწმეებმა ისაუბრეს, რომ დეკანოზი ხელფასს იღებდა იმ კომპანიიდან, რომლის დამფუძნებელიც მისი მეგობარი იყო”, - განაცხადა გუბელაძემ.
