დემირელის სკოლის ხარისხის მართვის მენეჯერის, მუსტაფა ემრე ჩაბუქის მეუღლე სახელმწიფო დაცვის სპეციალურ პროგრამაში ჩართვას ითხოვს.
დაცვის მოთხოვნით, ემრე ჩაბუქის მეუღლემ და ადვოკატმა საქართველოს პროკურატურას დღეს მიმართეს.
როგორც თუბა ჩაბუქი ამბობს, სოციალური ქსელში გამუდმებით იღებს მუქარის შემცველ შეტყობინებებს, მისთვის უცნობი პირებისგან.
"მუქარის გზავნილებს ადრეც ვიღებდი, თუმცა ბოლო პერიოდში ამან უფრო აგრესიული ხასიათი მიიღო. განადგურებით მემუქრებიან. თურქულ მედიაში დაიბეჭდა სტატიები ჩემს ოჯახზე, სადაც მოღალატეებად ვართ მოხსენებული და წერენ წერილებს, რომ უნდა ჩამოვიდნენ და დაგვხოცონ. მარტო ვარ, ორ ბავშვთან ერთად, მეუღლე გვერდით არ მყავს და მეშინია", - აცხადებს მუსტაფა ემრე ჩაბუქის მეუღლე.
