„გირჩის“ ქუთაისის ოფისის ხელმძღვანელი თემურ ცამციშვილი უკანონოდ იდევნება, - ამის შესახებ პარტიის თავმჯდომარე ზურაბ ჯაფარიძემ ისაუბრა.
როგორც ჯაფარიძემ აღნიშნა, ცამციშვილს ქუთაისის სააპელაციო სასამართლოში სარჩელი შეაქვს. მისი თქმით, ის პირველი ინსტანციის სასამართლოს გადაწყვეტილებას ასაჩივრებს, რომელმაც მას ქუთაისის მერიის სასარგებლოდ 6 000 ლარის გადახდა დააკისრა.
ზურაბ ჯაფარიძე ქუთაისის სააპელაციო სასამართლოს მოუწოდებს, გააუქმოს სასამართლოს პირველი ინსტანციის გადაწყვეტილება.
„ქუთაისის მერია სასამართლო ხელისუფლების დახმარებით აპირებს თემურ ცამციშვილს წაართვას თანხა, რომელიც მას თავის დროზე უსამართლოდ დააკისრეს, რომელიც თემურს ერთხელ უკვე გადახდილი აქვს სახელმწიფოსთვის და რომელსაც ამავე დროს, პარალელურად იხდის საქმეში მონაწილე ერთ-ერთი კერძო კომპანიაც. ჩვენ ვზრუნავთ არა მხოლოდ თემურ ცამციშვილის ფინანსურ მდგომარეობაზე, არამედ საქართველოს საერთო სასამართლოების პრესტიჟზეც, რომელსაც ისე არაფერი ანადგურებს, როგორც საკუთარი ბრიყვული გადაწყვეტილებებისგან განცდილი უხერხულობა. მოვუწოდებთ ქუთაისის სააპელაციო სასამართლოს, გააუქმოს პირველი ინსტანციის გადაწყვეტილება, რადგანაც საქმე გვაქვს არა უბრალოდ არაკანონიერ, არამედ სასაცილოდ კანონსაწინააღმდეგო შემთხვევასთან, რომელიც ხელს შეუშლის ჩვენი თანამოქალაქეების მხრიდან სასამართლოს, როგორც ინსტიტუციის და ხელისუფლების ერთ-ერთი შტოს მიმართ სერიოზული დამოკიდებულების ჩამოყალიბებას“, - განაცხადა ზურაბ ჯაფარიძემ.
