ჩვენ როდესაც ვამბობთ, რომ ანგარებით აპირებდა მკვლელობას, ეს მტკიცებულებები კიდევ ერთხელ უსვამს ხაზს მის ანგარებას, - ამის შესახებ ე.წ. ციანიდის საქმის პროკურორმა ზვიად გუბელაძემ ჟურნალისტებს ე.წ. ციანიდის საქმის სასამართლო პროცესის დასრულების შემდეგ განუცხადა.
მისი განცხადებით, ბრალდებულმა გიორგი მამალაძემ, საპატრიარქოს კლინიკის დირექტორის რანგში მეგობრის შპს-სთან გააფორმა ხელშეკრულება კონსტულტაციების გაწევაზე, თუმცა ამ შპს-ს არავითარი კონსულტაცია არ გაუწევია კლინიკისთვის, გადახდილი თანხა კი ბრალდებულს უბრუნდებოდა ხელფასის სახით.
"არც ერთ ადვოკატს არ გაუკეთებია განცხადებები რევიზორების დაკითხვასთან დაკავშირებით და სპეციალურად ცდილობენ აღნიშნულ საკითხს გვერდი აუარონ, რადგან საზოგადოებისთვის არ გახდეს ცნობილი ეს საკითხი. ალბათ გახსოვთ დაცვის მხარის აპელირება, თითქოს გიორგი მამალაძე იყო კორუფციასთან მებრძოლი სასულიერო პირი, ამხელდა სხვადასხვა სასულიერო პირებს კორუფციაში და ამის გამო მოხდა თითქოს მისი ჩამოშორება საქმიანობიდან. რეალობა კი სხვაა. მას შემდეგ, რაც 2016 წლის იანვარში ის დაინიშნა საპატრიარქოს კლინიკის დირექტორად, თავისი მეგობრის შპს-სთან გააფორმა ხელშეკრულება და კონსულტაციების სანაცვლოდ ამ კომპანიისთვის უნდა გადაეხადა თანხა. სინამდვილეში კი ამ შპს-ს არც კონსულტაციები გაუწევია კლინიკისთვის და რეალურად გადახდილი თანხა უკან უბრუნდებოდა ბრალდებულს ხელფასის სახით. ბრალდებული ამ ერთგვარი სქემით ახდენდა უსაფუძვლო გამდიდრებას და ამით კარგად წარმოჩინდა მისი პიროვნული მახასიათებლები. ჩვენ როდესაც ვამბობთ, რომ ანგარებით აპირებდა მკვლელობას, ეს მტკიცებულებები კიდევ ერთხელ უსვამს ხაზს მის ანგარებას”, - განაცხადა გუბელაძემ.
