სასამართლოებმა თავიანთი გადაწყვეტილებების დასაბუთებულობის ხარისხი ევროპული სასამართლოს პრეცედენტებით უნდა გააძლიერონ, - ამის შესახებ უზენაესი სასამართლოსა და იუსტიციის უმაღლესი საბჭოს თავმჯდომარემ ნინო გვენეტაძემ ჟურნალისტებს, ხელისუფლების მიერ ადამიანის უფლებათა ევროპული სასამართლოს გადაწყვეტილებების აღსრულებაზე ეფექტური საპარლამენტო კონტროლის თაობაზე სამუშაო შეხვედრის დაწყებამდე განუცხადა.
მისი თქმით, აღსრულების კუთხით სასამართლოებსაც აქვთ წინსვლა.
"სასამართლოებმა თავიანთი გადაწყვეტილებების დასაბუთებულობის ხარისხი, ევროპული სასამართლოს პრეცედენტებით უნდა გააძლიერონ და ამავდროულად, უფრო მეტ მნიშვნელობას იძენს ჩვენთვის ის გადაწყვეტილებები, მათი აღსრულების საკითხები და მექანიზმები, რომელიც სტრასბურგმა საქართველოს წინააღმდეგ მიიღო. როგორც სისხლის სამართლის ასევე სამოქალაქო სამართლის საპროცესო კანონმდებლობაში ჩვენ უკვე კარგა ხანია გვაქვს ნორმა გადაწყვეტილებების აღსრულებასთან დაკავშირებით. ძალიან საინტერესო ურთიერთობა გვაქვს ჩვენ ამ მხრივ საქართველოს პარლამენტთან და აღმასრულებელ ხელისუფლებასთან. ვფიქრობ, აღსრულების კუთხით სასამართლოებსაც აქვთ წინსვლა", - განაცხადა ნინო გვენეტაძემ.
