თბილისის საქალაქო სასამართლოში პრეზიდენტის სიძის, მინდია გოგოჭურის მეგობრის, მიხეილ თათარიშვილის საქმის განხილვა დასრულდა. საქმის მასალების მიხედვით, თათარიშვილის დაკავება 17 მარტს სურამში, თამარ მეფის #100-ის მიმდებარე ტერიტორიაზე მოხდა. ამის საპირისპიროს აცხადებდნენ სასამართლო პროცესზე დაცვის მხარის მოწმეები. მათი თქმით, თათარიშვილი დაბა სურამში, ერთ-ერთ სასადილოში დააკავეს.
დღევანდელი პროცესის მიმდინარეობის შესახებ ”ჯი-ეიჩ-ენ”-ს თათარიშვილის ადვოკატი, ირმა ჭკადუა ესაუბრა.
”ბრალდების 2 და დაცვის 5 მოწმე დაიკითხა. ბრალდების მოწმეებიდან ერთმა დაადასტურა, რომ შემთხვევის ადგილზე იმყოფებოდა და ჩხრეკისას რაიმე ნივთიერება ამოღებული არ უნახავს. მეორე მოწმემ თქვა, რომ შემთხვევის ადგილზე არ ყოფილა, შესაბამისად, არც არაფერი უნახავს.
დაცვის მოწმეებმა დაადასტურეს ის, რაც ბრალდების გარკვეულმა მოწმეებმა განაცხადეს. თათარიშვილის დაკავება ქუჩაში, თამარ მეფის #100 ნომერში კი არა, სასადილოში მოხდა, სადაც მათ შეკვეთილი ჰქონდათ ხაჭაპური, მწვადი, სოკო და ა.შ. პოლიციის თანამშრომლები შევარდნენ და ისინი სასადილოდან გამოიყვანეს. ეს ყველაფერი მაქსიმუმ, 3-5 წუთის განმავლობაში მოხდა. ამან დაადასტურა, რომ შემთხვევის ადგილზე არც ჩხრეკა ჩატარებულა და არც დაკავების ოქმი შეუდგენიათ”, - განაცხადა ”ჯი-ეიჩ-ენ”-თან საუბარში ადვოკატმა, ირმა ჭკადუამ.
საპირისპიროში ირმწუნება საქმის პროკურორი, ვასილ სამხარაძე. მისი თქმით, საქმეში მიხეილ თათარიშვილის ბრალეულობა აშკარაა.
შემდეგი სასამართლო პროცესი 6 ივლისს, 12 სათზეა ჩანიშნული. ამ დღეს დაცვის ერთი მოწმე დაიკითხება, რის შემდეგაც მხარეები დასკვნით სიტყვას წარმოთქვამენ. ამის შემდეგ მოსამართლე გადაწყვეტილების მისაღებად გავა.
შეგახსენებთ, რომ მიხეილ თათარიშვილს სახელმწიფო ბრალდება ნარკოდანაშაულს ედავება. თუმცა, ის თავს დამნაშავედ არ მიიჩნევს.
