ე.წ ციანიდის საქმის პროკურორის, ზვიად გუბელაძის განმარტებით, შორენა თეთრუაშვილი უახლოეს მომავალში დაიკითხება.
დღევანდელ პროცესზე კი ბრალდების მხარის 10 მოწმის დაკითხვა იგეგმება - მათ შორის გამომძიებლები, რომლებმაც, პროკურორის თქმით, მამალაძის ბარგი და მისი ბინიდან, ცეცხლსასროლი იარაღი ამოიღეს.
პროკურორის განცხადებით, გამომძიებლები ისაუბრებენ მათ მიერ ჩატარებული საგამოძიებო ღონისძიებების კანონიერებაზე და პროკურორის განცხადებით, ამით წერტილი დაესმება დაცვის მხარის აპელირებას, რომ თითქოსდა რაიმე კანონი იქნა დარღვეული.
„მოწმეებს შორის არიან გამომძიებლები, რომლებმაც უშუალოდ აეროპორტიდან ამოიღეს ბრალდებულის ბარგი და გამომძიებლები, რომლებმაც ბინის ჩხრეკა ჩაატარეს და ამოიღეს ცეცხლსასროლი იარაღი. ისაუბრებენ საგამოძიებო მოქმედებების კანონიერებაზე, საბოლოოდ წერტილი დაესმება დაცვის მხარის აპელირებას, თითქოს კანონდარღვევას ჰქონდა ადგილი.
მიგვაჩნია, რომ ჩვენ მიერ ჩატარებული საგამოძიებო ღონისძიებები კითხვის ნიშნებს არ აჩენს. რაც შეეხება დაზარალებულ შორენა თეთრუაშვილს, მისი დაკითხვა უახლოეს მომავალში იგეგმება", -განაცხადა ზვიად გუბელაძემ.
