დღეს არც მეტი, არც ნაკლები, ბრალდების პოზიცია, ბრალდების ბრალი გადატყდა ხერხემალში, მარტივი მიზეზის გამო, საქმის მთავარმა მოწმემ ბრალი არ დაადასტურა, - ამის შესახებ ადვოკატმა გიორგი ფანცულაიამ განაცხადა.
ადვოკატი პროკურორ ჯარჯი წიკლაურს, რომელიც საპირისპიროდ ამტკიცებს, რომ საქმის მთავარმა მოწმემ დაადასტურა, რომ დეკანოზს მომწამვლელი ნივთიერება ადამიანის მკვლელობისთვის სჭირდებოდა, მოუწოდებს, რომ ცრუ ინფორმაციას ნუ ავრცელებს. მისივე თქმით, დადგება დრო, სხდომა გასაჯაროვდება, სადაც ის ირაკლი მამალაძეს უსვამს შეკითხვას და ის ვერ ადასტურებს ბრალს.
"მე მეტ შინაარსობრივ განხილვაში შესვლის უფლება არ მაქვს, სხდომა არის დახურული, მაგრამ გეუბნებით, კონკრეტულ ბრალზე ჩემს მიერ დასმულ შეკითხვაზე ბრალი არ დაადასტურა. შესაბამისად, სასამართლოს არ აქვს უფლება, გამამტყუნებელი განაჩენი გამოიტანოს",- განაცხადა გიორგი ფანცულაიამ.
