ბათუმის მოვლენებზე სისხლის სამართლის ბრალდებით დაკავებული მერაბ ღოღობერიძისა და ირაკლი ჩხვირკიას სასამართლო პროცესი 3 ივლისს განახლდება.
დღევანდელ სხდომაზე პროკურატურამ დაკითხვის ოქმები მტკიცებულების სახით წარმოადგინა. მოსამართლე ვიოლეტა ფორჩხიძემ მტკიცებულებები დასაშვებად სცნო.
ბრალდებულების ადვოკატებმა განაცხადეს, რომ აჭარის პოლიციის დეპარტამენტი საქმეს არ უნდა იძიებდეს, რადგან ის უშუალოდ მხარეს წარმოადგენს. პროცესზე დაცვის მხარე ბრალდებულების მიმართ აღკვეთის ღონისძიების სახით გირაოს შეფარდებას და საქმის წარმოების შეწყვეტას ითხოვდა, თუმცა მოსამართლე ვიოლეტა ფორჩხიძემ მოთხოვნა არ დააკმაყოფილა.
ცნობისთვის, ირაკლი ჩხვირკია და მერაბ ღოღობერიძე დაკავებულები არიან სსკ-ის 225-ე მუხლის პირველი ნაწილით, რაც გულისხმობს ჯგუფური მოქმედების ორგანიზებას ან ხელმძღვანელობას, რასაც თან ახლავს ძალადობა, რბევა, სხვისი ნივთის დაზიანება ან განადგურება, იარაღის გამოყენება, იარაღის გამოყენებით ხელისუფლების წარმომადგენლისადმი წინააღმდეგობა ან/და მათზე თავდასხმა.
