"ცენტრ პოინტის" საქმეზე მაგნოლიას ეპიზოდის განხილვა გურამ რჩეულიშვილის გამოუცხადებლობის გამო გადაიდო.
რჩეულიშვილის ადვოკატმა პროცესის გადადება ბრალდებულის ჯანმრთელობის მდგომარეობის გამო ითხოვა და შესაბამისი დოკუმენტიც წარადგინა.
საქმის პროკურორებმა დაცვის შუამდგომლობა გააპროტესტეს და ადვოკატები სასამართლო პროცესების გაჭიანურებაში დაადანაშაულეს.
მოსამართლე მაია შოშიაშვილმა ბრალდების შუამდგომლობა პროცესის გაგრძელების შესახებ არ გაიზიარა და სხდომა გადადო.
აღსანიშნავია, რომ „ცენტრ-პოინტის“ მიერ დაზარალებულები ადვოკატს საქმის ხელოვნურად გაჭიანურებაში ადანაშაულებენ. მაღ დღეს საქალაქო სასამართლოსთან აქციას გამართეს და განაცხადეს, რომ პროცესები ხშირად სრულიად უმიზეზოდ იდება.
„ჩვენ ვართ დაზარალებულები და დროულად გვინდა მორჩეს და გაირკვეს ჩვენი საქმე, თუმცა ხშირად ჩვენი საქმის მოსამართლე, მაია შოშიაშვილი პროცესებს გაურკვეველი მიზეზებით გადადებს ხოლმე და ეს აჩენს ეჭვს, რომ ყველაფერი კეთდება იმისთვის, რათა პროცესები გაიწელოს. ერთ-ერთი ადვოკატი ორსულად არის და ხშირად მისი ჯანმრთელობის მდგომარეობის გამოც ხდება პროცესების გადადება. ეს ყველაფერი უნდა დასრულდეს და პროცესები წარიმართოს ნორმალურ რეჟიმში“,- განაცხადა ერთ-ერთმა დაზარალებულმა.
ცნობისთვის, "ცენტრ პოინტის" საქმის "მაგნოლიის" ეპიზოდზე დღეს დაცვის მხარის მოწმეები უნდა დაეკითხათ.
გურამ რჩეულიშვილმა პროკურატურას საპროცესო შეთანხმების პირობების შესრულების გეგმა უკვე წარუდგინა და პასუხს ელოდება. საუბარია პროექტებზე და ინვესტორთა სიაზე, რომლებიც დაზარალებულებს დააკმაყოფილებენ. მაია რჩეულიშვილს და რუსუდან კერვალიშვილს თბილისის საქალაქო სასამართლომ 4-4-წლიანი პატიმრობა 31 მარტს მიუსაჯა.
პროკურატურა "ცენტრ პოინტის" დამფუძნებლებს თაღლითობას და თანხების მითვისებას ედავებოდა. გურამ რჩეულიშვილი 30 000-ლარიანი გირაოთი 6 აპრილს გაათავისუფლეს. 63 წლის ვახტანგ რჩეულიშვილი 13 აპრილს გარდაიცვალა.
