გიყვარს თუ არა ბიო, ასეთი კითხვა დამისვეს სამართალდამცველებმა, - ამის შესახებ „ბირჟა მაფიას“ ერთ-ერთა წევრმა, გიორგი ქებურიამ გადაცემა "არჩევანში" განაცხადა.
როგორც ქებურიამ აღნიშნა, ის მანქანიდან სამოქალაქო ფორმაში გამოწყობილმა 2-მა ადამიანმა ძალის გამოყენებით, ყოველგვარი ახსნა-განმარტების გარეშე გადმოიყვანა. მისი თქმით, სამართალდამცველები მასზე ფსიქოლოგიურ ზეწოლას ახორციელებდნენ და ეუბნებოდნენ, რომ სჯობდა მას არ ემღერა.
„კისერზე მომკიდეს ხელი, დამაკავეს და მივყავდი თავისი მანქანისკენ, არ უთქვამთ ვინ იყვნენ. როცა ვუსვამდი შეკითხვებს, არავის პასუხი არ გაუცია,“ - განაცხადა გიორგი ქებურიამ.
მან აქვე აღნიშნა, რომ სამართალდამცველები "ბირჟა მაფიას" ორივე წევრს ურჩევდნენ, რომ დანაშაული დაებრალებინათ, წინააღმდეგ შემთხვევაში, მათი მდგომარეობა უფრო გართულდებოდა.
ქებურიას განცხადებით, დაკავებამდე, კლიპის დამფინანსებელ კომპანიას სამართალდამცველები დაუკავშირდნენ და მისი ინტერნეტსივრციდან აღება მოსთხოვეს, თუმცა მათ ვიდეორგოლში მხოლოდ სამართალდამცველის როლის შემსრულებელი დაფარეს.
