გამოხატვის თავისუფლება გულისხმობს სახელმწიფო ინსტიტუტის გაშარჟებასაც - თეა წულუკიანი, მეორე თემაა, რა უნდა გავაკეთოთ, რომ ახალგაზრდებს არ გაუჩნდეთ გაშარჟების სურვილი - ამის შესახებ საქართველოს იუსტიციის მინისტრმა თეა წულუკიანმა "ბირჟა მაფიას" საქმეზე საუბრისას განაცხადა.
მინისტრის განცხადებით, აქ ორი რამ არის გასამიჯნი - სისხლის სამართლის საქმე და თავად ვიდეორგოლი. მისივე თქმით, გამოხატვის თავისუფლება, მით უმეტეს როცა საუბარი რეპს ეხება, გულისხმობს იმასაც, რომ გაშარჟებული უნდა იქნას ესა თუ ის სახელმწიფო ინსტიტუტი, მეორე თემაა თავად სახელმწიფო ინსტიტუტებმა რა უნდა გააკეთონ იმისათვის, რომ ახალგაზრდა თაობას არ გაუჩნდეს გაშარჟების სურვილი.
"მეორე თემაა თავად სახელმწიფო ინსტიტუტებმა, მე, ჩემნაირმა სხვა წარმომადგენლებმა, პოლიციელებმა, მოსამართლეებმა, პროკურორებმა და აღმასრულებლებმა რა უნდა გავაკეთოთ იმისათვის, რომ ახალგაზრდა თაობას არ გაუჩნდეს სურვილი, გაგვაშარჟოს. ამაზე ყველამ უნდა ვიმუშაოთ", - განაცხადა თეა წულუკიანმა.
მინისტრის თქმით, პოლიცია და ჯარი არის ის ინსტიტუტები, რაც დამოუკიდებელი სახელმწიფოებრიობის პირველი ნიშანია.
"ამიტომ მინდა, მოვუწოდო ახალგაზრდა თაობას, ვინც მისდევს რეპს, თუ მომავალში ცოტა უფრო მეტი სიფრთხილით მოვეკიდებით ამ საკითხს, კარგი იქნება, თუ ვერ მოვეკიდებით, არც ეს არის პრობლემა, რადგან ყველას გვაქვს გამოხატვის თავისუფლება", - აღნიშნა მინისტრმა.
