სამწუხაროდ, მე ეს ფაქტი [აზერბაიჯანელი ჟურნალისტის გაუჩინარების] მიქმნის განცდას, რომ ამ ქვეყანაში არავინ არ არის დაცული და მსგავსი ფაქტი შეიძლება განმეორდეს, - ამის შესახებ საქართველოს სახალხო დამცველმა, უჩა ნანუაშვილმა ჟურნალისტებს განუცხადა.
მისი თქმით, თუ საქართველოს ხელისუფლებამ არ იცოდა ამის შესახებ ეს, რა თქმა უნდა, საგანგაშოა და თუ იცოდა, ეს კიდევ უფრო უარესი სამწუხარო ფაქტია და ამის გამოძიება განსაკუთრებით მნიშვნელოვანია.
"ეს არის ძალიან სამწუხარო და შეიძლება ითქვას საგანგაშო ფაქტი, როდესაც ქალაქის ცენტრში იკარგება ადამიანი, შემდეგ ვიგებთ, რომ ის სხვა, მეზობელ სახელმწიფოში არის, ასევე, ის არის წამების და არასათანადო მოპყრობის მსხვერპლი. უნდა დადგეს შესაბამისი სახელმწიფო სტრუქტურების პასუხისმგებლობის საკითხი. აქ საუბარია პოლიტიკურ პასუხისმგებლობაზე. თუ არ იქნება პასუხი გაცემული კითხვაზე - რამდენად არის ქვეყანაში თითოეული მოქალაქის უსაფრთხოება დაცული და ასევე, ძალიან მნიშვნელოვანია, პასუხი გაეცეს კითხვას - არის თუ არა საქართველოში დაცული თითოეული მოქალაქე. სამწუხაროდ, მე ეს ფაქტი მიქმნის განცდას, რომ ამ ქვეყანაში არავინ არ არის დაცული და მსგავსი ფაქტი შეიძლება განმეორდეს. მითუმეტეს, როდესაც საუბარია მეზობელ სახელმწიფოში ადამიანის გადაყვანაზე. ეს არის ყველაზე საგანგაშო. თუ საქართველოს ხელისუფლებამ არ იცოდა ამის შესახებ ეს, რა თქმა უნდა, საგანგაშოა და თუ იცოდა, ეს კიდევ უფრო უარესი სამწუხარო ფაქტია და ამის გამოძიება განსაკუთრებით მნიშვნელოვანია”, - განაცხადა უჩა ნანუაშვილმა.
ცნობისთვის, სოლიდარობა აფგან მუხთარლის! - ამ ლოზუნგით საქართველოს მთავრობის კანცელარიასთან საპროტესტო აქცია მიმდინარებს. ჟურნალისტები, პოლიტიკოსები და სამოქალაქო საზოგადოების წევრები საქართველოს მთავრობისგან განმარტებებს მოითხოვენ.
შეგახსენებთ, აზერბაიჯანელი ჟურნალისტი არსებული ინფორმაციით, თბილისიდან გაიტაცეს და იგი ბაქოშია დაპატიმრებული. ჯერჯერობით უცნობია, როგორ მოხდა მისი საზღვარზე გადაყვანა. თბილისში გაუჩინარებული აზერბაიჯანელი ჟურნალისტის თქმით, ის აზერბაიჯანის მხარეს საქართველოს უშიშროების ძალებმა გადასცეს.
