გელა მიქაძე აპირებს სამართლებრივ ბრძოლას რათა დადასტურდეს სიმართლე, - ასე გამოეხმაურა პარლამენტის ვიცე-სპიკერი ირმა ინაშვილი „პატრიოტთა ალიანსის“ წევრ გელა მიქაძისთვის არაბთა გაერთიანებული საამიროების სასამართლოს მიერ 15-წლიანი პატიმრობის დაუსწრებლად შეფარდებას.
ირმა ინაშვილის განცხადებით, ასეთ განაჩენებს ევროპა ყოველთვის კითხვის ნიშნის ქვეშ აყენებს.
„გელა მიქაძე არის ძალიან მცოდნე, კომპეტენტური ბიზნესმენი, ეკონომისტი. სასარგებლოა ასეთი დეპუტატი გუნდისთვისაც და პარლამენტისთვისაც. ეს თემა ძალიან საჩოთიროა. ბევრი კითხვის ნიშანია. ამირა, რომელიც თავად არის ამ საქმის ფიგურანტი და ამ საამიროში სასამართლოს თავმჯდომარე, ასეთ განაჩენებს ევროპა ყოველთვის კითხვის ნიშნის ქვეშ აყენებს. გელა მიქაძე აპირებს სამართლებრივ ბრძოლას, რათა დადასტურდეს სიმართლე“, - განაცხადა ირმა ინაშვილმა.
ცნობისთვის, საქართველოს პარლამენტის წევრს „პატრიოტთა ალიანსიდან“ გელა მიქაძეს არაბთა გაერთიანებული საამიროების სასამართლომ 17,2 მილიონი აშშ დოლარის მითვისების ბრალდებით 15-წლიანი პატიმრობა დაუსწრებლად მიუსაჯა.
