ტელეკომპანია "თრიალეთის" გადამღებ ჯგუფს, რომლებიც სტალინის ძეგლის დემონტაჟის პროცესის გადაღებას ცდილობდნენ სამართლდამცველები ფიზიკურად გაუსწორდნენ და პროფესიული მოვალეობის შესრულების საშუალება არ მისცეს. ინციდენტი 24 ივნისს მოხდა.
ფიზიკური შეურაცხყოფა მიაყენეს საინფორმაციო სამსახურის პროდიუსერ ლადო ბიჭაშვილსა და ოპერატორ იმედა გოგოლაძეს. ამის შესახებ ტელეკომპანია თრიალეთის ჟურნალისტები საუბრობენ. ჟურნალისტების მტკიცებით, მათ პოლიციამ კამერა წაართვა და კადრები წაუშალა. მომხდარის შემდეგ გორში ჩავიდნენ ყოფილი სახალხო დამცველი სოზარ სუბარი და ფონდ ,,2020" -ის დამფუძნებელი ეროსი კიწმარიშვილი, მათ ,,თრაილეთის" დამფუძნებელი ბადრი ნანეტაშვილი შეხვდა, კიწმარიშვილმა და სუბარმა მომხდარი დაგმეს.
"ჯი-ეიჩ-ენთან" საუბარში, დაზარალებული ლადო ბიჭაშვილი აღნიშნავს, რომ ინციდენტის დროს ქალაქის ცენტრალურ მოედანზე იმყოფებოდნენ სამხარეო პოლიციის უფროსი ვლადიმერ ჯუღელი და გორის პოლიციის უფროსი მიშა კანდელაკი, რომლებიც ჟურნალისტების ცემის ფაქტს პირადად შეესწრნენ. ბიჭაშვილი აღნიშნავს, რომ მათ 8 პოლიციელი სცემდათ.
"როდესაც ძეგლს მივუახლოვდით იმ მხარეს დავდექით, სადაც ხალხი იმყოფებოდა. პოლიციის მხარეს მდგარ კამერებს პოლიცია აკონტროლებდა - რა უნდა გადაეღოთ ჟურნალისტებს და რა არა. მას შემდეგ, რაც პოლიციელებმა ხალხის მხარეს მდგომი ჩვენი კამერა დაინახეს, მოგვარდნენ, მოინდომეს კამერის წარმთმევა. დაახლოებით 8 ადამიანმა გვცემა. ისინი ცდილობდნენ, რომ წავექციეთ და კამერა წაერთმიათ. იქ იმყოფებოდა სამხარეო პოლიციის უფროსი ვლადიმერ ჯუღელი და გორის პოლიციის უფროსი მიშა კანდელაკი", - "ჯი-ეიჩ-ენს" განუცხადა ლადო ბიჭაშვილმა.
დაზარალებული ჟურნალისტი სასამართლოში საქმის აღძვრასაც აპირებს.
"ახლა მიმდინარეობს კონსულტაციები ახალგაზრდა იურისტთა ასოციაციასთან, ვაპირებ, საქმე აღვძრა ერთი, რომ ჩვენ პროფესიული მოვალეობის შესრულებაში შეგვეშალა ხელი და მეორე გარემოება - სხეულის განზრახ დაზიანება იქნება", - აღნიშნა ბიჭაშვილმა.
