უკანასკნელ წლებში, შესანიშნავი წინსვლა იყო მთელ მსოფლიოში ადამიანის ყველა უფლებით სარგებლობის გაუმჯობესების კუთხით ლესბოსელი, გეი, ბისექსუალი, ტრანსგენდერი და ინტერსექსუალი (ლგბტი) პირებისთვის, - ამის შესახებ ჰომოფობიასთან, ტრანსფობიასა და ბიფობიასთან ბრძოლის საერთაშორისო დღესთან დაკავშირებით უმაღლესი წარმომადგენლის, ფედერიკა მოგერინის განცხადებაშია აღნიშნული.
ევროკავშირის სახელით გავრცელებულ განცხადებაში წერია, რომ ევროკავშირი მთელ მსოფლიოში აფინანსებს პროექტებს, რომელთა მიზანია "ლგბტი" ორგანიზაციების ხილვადობისა და აღიარების გაუმჯობესება, ხელისუფლებებთან მათი დიალოგის გაღრმავება კანონების შესაცვლელად, ჰომოფობიის წინააღმდეგ ბრძოლა და "ლგბტი" პირების ძალადობისაგან დაცვა.
"მილიონობით ადამიანთან ერთად მსოფლიოს გარშემო, ამ დღეს ევროკავშირი აღნიშნავს ჰომოფობიასთან, ტრანსფობიასა და ბიფობიასთან ბრძოლის საერთაშორისო დღეს. ეს ხელსაყრელი შესაძლებლობაა, რათა ხელისუფლებებს შევახსენოთ ადამიანის უფლებათა საყოველთაობის მხარდაჭერის ვალდებულება და უზრუნველვყოთ, რომ ყველამ, მიუხედავად გენდერული იდენტობისა თუ სექსუალური ორიენტაციისა, ისარგებლოს ამ უფლებებით დისკრიმინაციის გარეშე.
უკანასკნელ წლებში, შესანიშნავი წინსვლა იყო მთელ მსოფლიოში ადამიანის ყველა უფლებით სარგებლობის გაუმჯობესების კუთხით ლესბოსელი, გეი, ბისექსუალი, ტრანსგენდერი და ინტერსექსუალი (ლგბტი) პირებისთვის. რამდენიმე ქვეყანამ მოახდინა ჰომოსექსუალიზმის დეკრიმინალიზაცია, ხოლო ზოგიერთმა სხვამ, მიიღო ახალი საკანონმდებლო აქტი ადამიანების სექსუალური ორიენტაციისა და გენდერული იდენტობის ნიშნით დევნისგან დასაცავად. ამ ცვლილებათაგან არცერთი არ განხორციელდებოდა, რომ არა გაბედული აქტივისტების თავდადება, რომლებიც "ლგბტი" პირებისთვის თანაბარი უფლებების მოპოვებისთვის იბრძვიან.
უამრავ ადგილას მთელი მსოფლიოს მასშტაბით კვლავაც სახეზეა დიდი წინაღობები. "ლგბტი" პირების მიმართ დისკრიმინაცია და ძალადობა კვლავ ფართოდაა გავრცელებული. ერთსქესიანი ურთიერთობის დამყარება დანაშაულად მიიჩნევა 70-ზე მეტ ქვეყანაში, ხოლო ზოგიერთ მათგანში საქმე შეიძლება სიკვდილით დასჯამდეც მივიდეს. ევროკავშირი უმკაცრესად გმობს "ლგბტი" პირების წინააღმდეგ მიმართულ დისკრიმინაციასა და ძალადობას.
ევროკავშირი მთელ მსოფლიოში აფინანსებს პროექტებს, რომელთა მიზანია "ლგბტი" ორგანიზაციების ხილვადობისა და აღიარების გაუმჯობესება, ხელისუფლებებთან მათი დიალოგის გაღრმავება კანონების შესაცვლელად, ჰომოფობიის წინააღმდეგ ბრძოლა და "ლგბტი" პირების ძალადობისაგან დაცვა. ასევე ხორციელდება "ლგბტი" პირებისა და სამოქალაქო საზოგადოების ორგანიზაციებისთვის ტრენინგები, ინფორმაციის მიწოდება და იურიდიული დახმარების აღმოჩენა.
2016 წლის ივნისში, ევროკავშირის საბჭომ პირველად მიიღო "ლგბტი" თანასწორობის დასკვნითი დოკუმენტი, აღნიშნულ საკითხზე ევროკომისიის ქმედებათა ნუსხის საპასუხოდ. ევროკავშირი განაგრძობს ყველა პარტნიორთან მუშაობას თითოეული ადამიანის უფლებათა გასაუმჯობესებლად, მიუხედავად მათი სექსუალური ორიენტაციისა და გენდერული იდენტობისა", - ნათქვამია განცხადებაში.
ცნობისთვის, 17 მაისი ჰომოფობიასთან, ტრანსფობიასა და ბიფობიასთან ბრძოლის საერთაშორისო დღეა.
