სახელმწიფო აუდიტის სამსახურის უფროსის, ლაშა თორდიას გამოკითხვა დასრულდა. გამომძიებლების განცხადებით, თორდიამ გამოძიებას მნიშვნელოვანი ინფორმაცია მისცა. რაც შეეხება საქმისთვის კვალიფიკაციის შეცვლას, მათ აღნიშნეს, რომ გამოძიების დასრულებამდე კვალიფიკაციის შეცვლაზე კომენტარი არ გაკეთდება.
თორდია გამოძიებასთან თანამშრომლობს, თუმცა ფიქრობს, რომ საგამოძიებო უწყება მომხდარი ფაქტის გადაფარვის მიზნით სხვა საკითხებზე აკეთებს აქცენტს. თორდიას ამის თქმის საფუძველს ყოფილ მთავარ პროკურორთან, ოთარ ფარცხალაძესთან ძალოვანი სტრუქტურის წარმომადგენლების სტუმრობა აძლევს.
თავდასხმის ფაქტზე შსს-მ გამოძიება სისხლის სამართლის კოდექსის 126-ე მუხლით დაიწყო, რაც ძალადობას გულისხმობს.
